വൈൽഡ് കാർഡിലും ഫലം കണ്ടില്ല; അനു ജോസഫ് ബിഗ് ബോസിൽ നിന്നും പുറത്ത്
Mail This Article
ബിഗ് ബോസ് മലയാളം സീസൺ ഫൈവിൽ നിന്നും നടി അനു ജോസഫ് പുറത്ത്. വൈൽഡ് കാർഡ് എൻട്രിയായി ഏറ്റവും ഒടുവിൽ ബിഗ് ബോസിൽ എത്തിയ മത്സരാർഥി കൂടിയായിരുന്നു അനു. ഇതോടെ വൈൽഡ് കാർഡ് എൻട്രിയായി ബിഗ്ബോസ് ഹൗസിനുള്ളില് പ്രവേശിച്ച മൂന്നുപേരും വീടിനോടു വിട പറഞ്ഞു. നാദിറ, അനു ജോസഫ്, അഖില് മാരാര്, റെനീഷ, ജുനൈസ്, അനിയന് മിഥുന്, ഷിജു, സെറീന എന്നിവരാണ് ഇത്തവണ നോമിനേഷനിൽ എത്തിയിരുന്നത്.
ആദ്യം മിഥുനും രണ്ടാമത് അഖിൽ മാരാരും സുരക്ഷിതരായി. നാദിറയും അനുവും ആണ് ഏറ്റവും ഒടുവില് വന്നത്. ശേഷം ഇരുവരെയും കണ്ഫഷന് റൂമിലേക്ക് വിളിച്ച മോഹന്ലാല് അനു പുറത്തായതായി അറിയിക്കുകയായിരുന്നു. നാദിറയുടെയും അനുവിന്റെയും കണ്ണു കെട്ടിയ ശേഷം രണ്ട് വാതിലിലൂടെ പുറത്തേക്ക് കൂട്ടിക്കൊണ്ട് പോകുകയാണ് ചെയ്തത്. ഒടുവില് നാദിറ വീട്ടിലേക്കും അനു പുറത്തേക്കും പോയി.
ബിഗ് ബോസ് സീസൺ അഞ്ചിലെ മൂന്നാമത്തെ വൈൽഡ് കാർഡ് എൻട്രിയാണ് അനു ജോസഫ്. ആദ്യം എത്തിയത് ഹനാൻ ആണ്. പക്ഷേ ആരോഗ്യപ്രശ്നങ്ങളാൽ ഹനാന് പുറത്തു പോകേണ്ടി വന്നു. രണ്ടാമത് എത്തിയത് സംവിധായകൻ ഒമർ ലുലുവും.
ടെലിവിഷൻ പരമ്പരകളിലും സിനിമകളിലും സജീവമായ അനു കാസർകോട് സ്വദേശിയാണ്. വെള്ളിമൂങ്ങ, പത്തേമാരി എന്നിവയാണ് അനു അഭിനയിച്ച പ്രധാന സിനിമകൾ.
English Summary: Bigg Boss Malayalam 5: Anu Joseph gets evicted from the show