‘അർജുൻ അശോകനെ’ അനുകരിച്ച് വിക്രവും മാളവികവും; ‘തങ്കലാൻ’ പാക്കപ്പ് വിഡിയോ

വിക്രമിനെ നായകനാക്കി പാ. രഞ്ജിത്ത് സംവിധാനം ചെയ്യുന്ന ‘തങ്കലാൻ’ പാക്കപ്പ് ആയി. രസകരമായൊരു പാക്കപ്പ് വിഡിയോയും അണിയറ പ്രവർത്തകർ സമൂഹമാധ്യമങ്ങളിലൂടെ പങ്കുവച്ചിട്ടുണ്ട്. ‘രോമാഞ്ചം’ സിനിമയിലെ അർജുന്‍ അശോകന്റെ തല കുലുക്കിയിലുള്ള പ്രത്യേക ആക്‌ഷൻ വച്ചാണ് ഈ വിഡിയോ തയാറാക്കിയിരിക്കുന്നത്. പാ. രഞ്ജിത്ത്, വിക്രം, മാളവിക മേനോൻ അടക്കമുള്ള അണിയറ പ്രവർത്തകർ ഈ ആക്‌ഷൻ കാണിക്കുന്നത് വിഡിയോയിൽ കാണാം.

സിനിമയ്ക്കായി വമ്പൻ മേക്കോവറാണ് വിക്രം നടത്തിയത്. തമിഴ് സിനിമാ ചരിത്രത്തിെല മറ്റൊരു വമ്പൻ സിനിമയാകും തങ്കലാൻ. വിക്രത്തിന്റെ പ്രകടനം തന്നെയാകും ചിത്രത്തിന് കരുത്താകുക.

മാളവിക മോഹനനും പാർവതി തിരുവോത്തുമാണ് നായികമാർ. പശുപതിയാണ് മറ്റൊരു പ്രധാന വേഷത്തിൽ. വ്യത്യസ്തമായ ​ഗെറ്റപ്പിലാണ് വിക്രം ചിത്രത്തിലെത്തുന്നത്. സ്റ്റുഡിയോ ഗ്രീനും നീലം പ്രൊഡക്‌ഷൻസുമാണ് നിർമാണം. കെ.ഇ. ജ്ഞാനവേൽ രാജയാണ് തങ്കലാൻ അവതരിപ്പിക്കുന്നത്.

പത്തൊമ്പതാം നൂറ്റാണ്ടിൽ ബ്രിട്ടfഷ് കാലഘട്ടത്തിൽ കോലാർ സ്വർണഖനികളിൽ നടന്ന ഒരു സംഭവത്തെ ആധാരമാക്കിയാണ് ചിത്രം ഒരുങ്ങുന്നത്. സംവിധായകൻ തന്നെയാണ് തിരക്കഥയും ഒരുക്കുന്നത്. തമിൾ പ്രഭയാണ് സഹ എഴുത്തുകാരൻ. ജി.വി. പ്രകാശ് കുമാർ സംഗീതസംവിധാനവും എ കിഷോർ കുമാർ ഛായാ​ഗ്രഹണവും നിർവഹിക്കുന്നു. അൻപ് അറിവ് ആണ് ആക്‌ഷൻ കൊറിയോഗ്രഫി.