ആസിഫ് അലിക്ക് പരുക്കേൽക്കുന്ന വിഡിയോ പുറത്ത്

സിനിമാ ചിത്രീകരണത്തിന്റെ ഭാഗമായി നടന്ന സ്റ്റണ്ട് പരിശീലനത്തിനിടയിൽ ആസിഫ് അലിക്ക് പരുക്ക്. ‘ടിക്കി ടാക്ക’ എന്ന സിനിമയുടെ സെറ്റിൽ വച്ചാണ് സംഭവം. 'കള' എന്ന ചിത്രത്തിന് ശേഷം രോഹിത്ത് വി. എസ്. സംവിധാനം ചെയ്യുന്ന ചിത്രമാണിത്. പരിശീലത്തിനിടെ താരത്തിന്റെ മുട്ടുകാലിനാണ് പരുക്കേറ്റത്.

പരുക്കേറ്റ ആസിഫ് അലിയെ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. സ്വകാര്യ ആശുപത്രിയിലെ ചികിത്സയ്ക്ക് ശേഷം നടൻ ആശുപത്രി വിട്ടു. വിശ്രമം വേണമെന്ന് ഡോക്ടർമാർ നിർദ്ദേശം നൽകിയിട്ടുണ്ട്. 

സിനിമയുടെ ചിത്രീകരണം പുരോഗമിക്കുന്നതിനിടയിലാണ് അപകടം. ആക്‌ഷന് പ്രാധാന്യം നൽകിയുള്ള ചിത്രത്തിൽ ഇന്തോനേഷ്യയിൽ നിന്നുള്ള ഉദേ നൻസ് എന്ന ഫൈറ്റ് മാസ്റ്ററാണ് സംഘട്ടന രംഗങ്ങൾ ഒരുക്കുന്നത്. 'ദ് റെയ്ഡ് റിഡെംപ്ഷൻ' എന്ന ഹോളിവുഡ് ചിത്രത്തിന്റെ സംഘട്ടന രംഗങ്ങൾ ഒരുക്കിയതും ഇദ്ദേഹമായിരുന്നു.