‘ഇതെല്ലാം മസിൽ ആണോ’; എക്സിനു വേണ്ടി ശരീരം മാറ്റിമറിച്ച് ആര്യ

മിസ്റ്റർ എക്സ് എന്ന പുതിയ തമിഴ് ചിത്രത്തിനു വേണ്ടി വമ്പൻ മേക്കോവറുമായി ആര്യ. ഒരു വർഷം കൊണ്ട് ശരീരത്തിൽ വന്ന മേക്കവോര്‍ ചിത്രങ്ങൾ ആര്യ തന്റെ ഇൻസ്റ്റഗ്രാമിലൂടെ പങ്കുവച്ചു. 

‘‘വീണ്ടും ഞാൻ തിരിച്ചെത്തി. ഇത്തവണ മനു ആനന്ദ് സംവിധാനം ചെയ്യുന്ന മിസ്റ്റർ എക്സിനു വേണ്ടിയാണ്. മാർച്ച് 2023ലാണ് തിരക്കഥ ലോക്ക് ചെയ്യുന്നത്. ഏപ്രിൽ തുടങ്ങി സിനിമയ്ക്കു വേണ്ടിയുള്ള തയാറെടുപ്പുകൾ. സെപ്റ്റംബറിൽ ചിത്രീകരണം തുടങ്ങിയ സിനിമ ഇപ്പോൾ ഫൈനൽ ഷെഡ്യൂളിലെത്തി നിൽക്കുന്നു. ജീവിത ലക്ഷ്യത്തിനു വേണ്ടിയുള്ള കുതിപ്പിന് ഒരു വർഷമാകുന്നു.’’–ആര്യയുടെ വാക്കുകൾ.

ആരാധകരും സഹപ്രവർത്തകരുമടക്കം നിരവധിപ്പേരാണ് ആര്യയെ അഭിനന്ദിച്ചെത്തുന്നത്. ഈ കാണുന്നതൊക്കെ മസിൽ ആണോ, അവിശ്വസനീയം എന്നൊക്കെയാണ് കമന്റുകൾ. മുൻപ് സർപാട്ടൈ പരമ്പരൈ എന്ന സിനിമയ്ക്കു വേണ്ടിയും ആര്യ തന്റെ ശരീരം മാറ്റിമറിച്ചിരുന്നു.

‘മിസ്റ്റർ എക്സി’ൽ മഞ്ജു വാരിയരാണ് നായിക. അസുരൻ, തുനിവ് എന്നീ ചിത്രങ്ങൾക്കുശേഷം മഞ്ജു അഭിനയിക്കുന്ന മൂന്നാമത്തെ തമിഴ് ചിത്രമാണ് മിസ്റ്റർ എക്സ്. മനു ആന്ദ് ആണ് സംവിധാനം. ആര്യയ്ക്കൊപ്പം ഗൗതം കാർത്തിക്, ശരത്കുമാർ, അനഘ, അതുല്യ രവി, റെയ്സ വിൽസൺ എന്നിവരും പ്രധാനവേഷങ്ങളിലെത്തുന്നു.

പ്രിൻസ് പിക്ചേഴ്സ് ആണ് നിർമാണം.  വിഷ്ണു വിശാലിനെ നായകനാക്കി ഒരുക്കിയ എഫ്ഐആറിനു ശേഷം മനു സംവിധാനം ചെയ്യുന്ന ചിത്രം കൂടിയാണിത്. 

വൻ ബജറ്റിലൊരുങ്ങുന്ന സിനിമ ഇന്ത്യ, ഉഗാണ്ട, ജോര്‍ജിയ എന്നിവിടങ്ങളിലായി ചിത്രീകരിക്കും. സ്റ്റണ്ട് സിൽവയാണ് ആക്‌ഷൻ കൊറിയോഗ്രാഫർ, സംഗീതം ദിപു നൈനാൻ തോമസ്, പ്രൊഡക്‌ഷൻ ഡിസൈനർ രാജീവൻ.