ആ ശബ്ദം, അതാണ് സന മൊയ്തുട്ടി; പുതിയ വിഡിയോ ഒരു രക്ഷയുമില്ല...!
Mail This Article
മലയാളികൾ എക്കാലവും നെഞ്ചേറ്റുന്ന നല്ലഗാനങ്ങൾ തന്റേതായ രീതിയിൽ അവതരിപ്പിച്ച് മലയാളി ഹൃദയത്തിൽ ഇടംനേടിയ ഗായികയാണ് സന മൊയ്ദുട്ടി. സനയുടെ പാട്ടുകളെല്ലാം തന്നെ സമൂഹമാധ്യമങ്ങളിൽ ഏറെ ശ്രദ്ധ നേടാറുണ്ട്. ഏറ്റവും ഒടുവിലായി പുറത്തിറങ്ങിയ കറുത്തപെണ്ണേ എന്ന ഗാനത്തിന്റെ കവറും യൂട്യൂബിൽ തരംഗമായിരുന്നു. ഇപ്പോള് പുതിയൊരു ഹിന്ദി കവർ ഗാനവുമായി എത്തുകയാണു സനയും സംഘവും.
ജബ് ജബ് ഫൂൽ ഖിലേ എന്ന ചിത്രത്തിനായി ലതാ മങ്കേഷ്കർ ആലപിച്ച യേ സമാ സമാ എന്ന ഗാനമാണ് സന പാടുന്നത്. ആനന്ദ് ബക്ഷിയുടെതാണു വരികള്. ആനന്ദ്ജി ആന്റ് കല്യാൺജിയാണു യഥാർഥ ഗാനത്തിനു സംഗീതം ഒരുക്കിയിരിക്കുന്നത്.
‘ഈ ഗാനം അവതരിപ്പിക്കണമെന്ന് ഞങ്ങൾ വളരെ ഏറെ ആഗ്രഹിച്ചിരുന്നു. ഇതൊരു സ്വപ്നസാക്ഷാത്കാരമാണ്.’ എന്നിങ്ങനെയുള്ള കുറിപ്പോടെയാണു സന ഗാനം പങ്കുവച്ചിരിക്കുന്നത്. യുട്യൂബിൽ മികച്ച പ്രതികരണം നേടി മുന്നേറുകയാണു സനയുടെ പുതിയ വിഡിയോ. ആ ശബ്ദം തന്നെയാണ് സനയെ മറ്റുള്ളവരിൽ നിന്നും വ്യത്യസ്തയാക്കുന്നത്. ശബ്ദത്തിനോട് അത്രയും ഇണങ്ങിയ ഗാനങ്ങളാണ് സന തിരഞ്ഞെടുക്കുന്നതെന്നതും ഏറെ അഭിനന്ദനം അർഹിക്കുന്നതാണെന്നും പലരും അഭിപ്രായപ്പെടുന്നു. ഒന്നരലക്ഷത്തോളം ആളുകൾ ഇതിനോടകം ഗാനം യൂട്യൂബിൽ കണ്ടുകഴിഞ്ഞു. അടുത്തിടെ വനിത ചലച്ചിത്ര പുരസ്കാര വേദിയിൽ സന മൊയ്തുട്ടി ആലപിച്ച ഗാനങ്ങൾ ഏറെ കയ്യടി നേടിയിരുന്നു.