‘അന്ന് പാടിയത് ഓർമയുണ്ടോ ലാല് അങ്കിൾ’, ശ്രേയക്കുട്ടിയുടെ പിറന്നാൾ സമ്മാനം
Mail This Article
മലയാളത്തിന്റെ പ്രിയതാരം മോഹൻലാലിന് പിറന്നാൾ സമ്മാനവുമായി കുട്ടിഗായിക ശ്രേയ ജയദീപ്. ഒപ്പം സിനിമയിലെ ‘മിനുങ്ങും മിന്നാമിനുങ്ങേ’ എന്ന ഗാനം ആലപിച്ചാണ് ശ്രേയ മോഹൻലാലിന് പിറന്നാൾ ആശംസകൾ നേർന്നത്. മോഹൻലാലിനൊപ്പം ഈ ഗാനം ഒരു വേദിയിൽ ആലപിച്ചതിന്റെ അനുഭവങ്ങളും ശ്രേയ മനോരമ ഓൺലൈനുമായി പങ്കുവച്ചു.
മോഹൻലാലിനൊപ്പമുള്ള ഫോട്ടോയുമായി എത്തിയാണ് ശ്രേയയുടെ ആശംസ. ശ്രേയയുടെ വാക്കുകൾ ഇങ്ങനെ: ‘ഹാപ്പി ബർത്ത് ഡേ ലാൽ അങ്കിൾ. ആസ്ട്രേലിയയിലെ പ്രോഗ്രാമിനാണ് നമ്മൾ അവസാനം കണ്ടത്. ലാൽ അങ്കിളിന് ഞാൻ ഇന്ന് ഒരു സർപ്രൈസ് തരാൻ പോകുകയാണ്. ഒരു ബർത്തഡേ ഗിഫ്റ്റ്. സാധാരണ ഞാൻ എല്ലാവർക്കും പാട്ടാണ് ഗിഫ്റ്റായി നൽകാറുള്ളത്. ഇത്തവണയും മാറ്റമൊന്നുമില്ല. ഈ പാട്ട് നമ്മൾ ഒപ്പത്തിന്റെ 100 ദിവസ ആഘോഷത്തിൽ പാടിയിട്ടുണ്ട്. ഞാൻ പാട്ടുപാടുകയാണ്.’ ഇത്രയും പറഞ്ഞതിനു ശേഷം ഒപ്പത്തിലെ ‘മിനുങ്ങും മിന്നാമിനുങ്ങേ’ എന്ന ഗാനവും ശ്രേയ പാടി.
മിനുങ്ങും മിന്നാമിനുങ്ങേ എന്ന ഗാനത്തിലൂടെയാണ് ശ്രേയ ചലച്ചിത്ര പിന്നണിഗാനരംഗത്ത് ശ്രദ്ധനേടുന്നത്. എം.ജി. ശ്രീകുമാറിനൊപ്പമായിരുന്നു ആലാപനം. ബി.കെ. ഹരിനാരായണന്റെ വരികൾക്ക് ഫോർമ്യൂസിക്കാണ് സംഗീതം നൽകിയിരിക്കുന്നത്.