ബാലഭാസ്കറിന്റെ അപകടമരണം സിബിഐ അന്വേഷിക്കും
Mail This Article
വയലിനിസ്റ്റ് ബാലഭാസ്കറിന്റെ അപകടമരണം സിബിഐ അന്വേഷിക്കും. നിലവിൽ ക്രൈംബ്രാഞ്ച് ആണ് കേസ് അന്വേഷിക്കുന്നത്. മരണത്തിൽ അസ്വഭാവികത ഇല്ല എന്ന നിഗമനത്തിലാണ് പൊലീസും എത്തിച്ചേർന്നത്.
മകന്റെ മരണത്തിൽ ദുരൂഹതയുണ്ടെന്നും കേസ് സിബിഐ അന്വേഷിക്കണമെന്നും ആവശ്യപ്പെട്ട് ബാലഭാസ്കറിന്റെ പിതാവ് കെ.സി.ഉണ്ണി രംഗത്ത് വരികയും മുഖ്യമന്ത്രിയെ കാണുകയും ചെയ്തിരുന്നു. പിതാവിന്റെ പരാതിയിലാണ് അന്വേഷണം സിബിഐക്ക് വിട്ട് സർക്കാർ ഉത്തരവിറക്കിയത്. ഒരാഴ്ചയ്ക്കുള്ളിൽ കേസ് സിബിഐക്ക് കൈമാറും.
ബാലഭാസ്കറിന്റെ പരിചയക്കാരനായ പ്രകാശ് തമ്പി തിരുവനന്തപുരത്ത് സ്വർണക്കടത്തു കേസിൽ അറസ്റ്റിലായതാണ് കേസിൽ വഴിത്തിരിവായത്. തുടർന്ന് ബാലഭാസ്കറിന്റെ മരണത്തിൽ ദുരൂഹതയുണ്ടെന്ന ആരോപണവുമായി ബന്ധുക്കൾ രംഗത്തു വന്നു.
2018 സെപ്റ്റംബർ 25–ന് തിരുവനന്തപുരം പള്ളിപ്പുറത്തു വച്ച് കാർ മരത്തിലിടിച്ചാണ് ബാലഭാസ്കറും കുടുംബവും അപകടത്തിൽ പെട്ടത്. മകൾ തേജസ്വിനി സംഭവസ്ഥലത്തും ബാലഭാസ്കർ ചികിത്സയിലിരിക്കെയും മരിച്ചു. ഭാര്യ ലക്ഷ്മിക്ക് അപകടത്തിൽ ഗുരുതരമായി പരുക്കേറ്റിരുന്നു.
