നടി നയാ റിവേരയെ ബോട്ടിങ്ങിനിടെ കാണാതെയായി; അവസാനം പങ്കു വച്ചത് മകനൊപ്പമുള്ള ബോട്ടിങ് ചിത്രം
Mail This Article
അഭിനേത്രിയും ഗായികയും മോഡലുമായ നയാ റിവേരയെ തടാകത്തിൽ കാണാതായി. സതേൺ കാലിഫോർണിയ പിരു തടാകത്തിലാണ് 33കാരിയായ റിവേരയെ കാണാതായത്. നാലു വയസ്സുകാരൻ മകനൊപ്പം ബോട്ടിൽ യാത്ര ചെയ്യവെയാണ് അപകടം. സംഭവത്തിനു തൊട്ടുമുൻപ് മകനൊപ്പമുള്ള ചിത്രം റിവേര സമൂഹമാധ്യമത്തിൽ പോസ്റ്റു ചെയ്തിരുന്നു.
ബുധനാഴ്ച ഉച്ചയോടെയാണ് മകനൊപ്പമെത്തി റിവേര ബോട്ട് വാടകയ്ക്ക് എടുത്തത്. മൂന്നു മണിക്കൂർ കഴിഞ്ഞും തിരിച്ചെത്താത്തതിനെത്തുടർന്നു നടത്തിയ അന്വേഷണത്തിലാണ് അപകടത്തെക്കുറിച്ചറിയുന്നത്. മകനെ ലൈഫ്ജാക്കറ്റ് ധരിച്ച് ഉറങ്ങുന്നതായി ബോട്ടിൽ നിന്നും കണ്ടെത്തി. റിവേര നീന്താനായി തടാകത്തില് ഇറങ്ങിയതാണെന്ന് മകൻ പറഞ്ഞതായി അന്വേഷണ ഉദ്യോഗസ്ഥർ അറിയിച്ചു. ബുധനാഴ്ച ആരംഭിച്ച തിരച്ചിൽ ഇപ്പോഴും തുടരുകയാണ്. നയാ റിവേര വെള്ളത്തിൽ മുങ്ങിപ്പോയിട്ടുണ്ടാകാം എന്ന അനുമാനത്തിലാണ് പോലീസ്.
2009 മുതൽ 2015 വരെ ഫോക്സിൽ സംപ്രേക്ഷണം ചെയ്ത മ്യൂസിക്കൽ-കോമഡി ഗ്ലീയിൽ ചിയർലീഡറായി റിവേര അഭിനയിച്ചിരുന്നു. നടൻ റയാൻ ഡോർസേയായിരുന്നു റിവേരയുടെ ഭർത്താവ്. 2018 ൽ ഇവർ വേർപിരിഞ്ഞു.