ബക്കറ്റുമായ് ഓടി നടന്ന് എരുമപ്പാൽ കറന്നെടുത്ത് ഗായിക നേഹ കക്കർ; കൗതുക വിഡിയോ
Mail This Article
ബോളിവുഡ് ഗായിക നേഹ കക്കർ എരുമയെ കറക്കുന്നതിന്റെ വിഡിയോ ആണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. സുഹൃത്തുക്കൾക്കൊപ്പം ഡൽഹിയിലെ എരുമവളർത്തൽ കേന്ദ്രം സന്ദർശിക്കാൻ എത്തിയതായിരുന്നു ഗായിക. കാഴ്ചകൾ ആസ്വദിക്കുന്നതിനിടെ കൗതുകത്തോടെ ബക്കറ്റ് കയ്യിലെടുത്ത് നേഹ എരുമയുടെ അടുത്തേയ്ക്ക് ഓടി പാൽ കറക്കാൻ തുടങ്ങി.
കറവക്കാരൻ നേഹയുടെ സമീപമിരുന്ന് എരുമയെ കറക്കേണ്ട രീതി പറഞ്ഞുകൊടുക്കുന്നുണ്ട്. തുടർന്ന് അൽപം പേടിയോടും കൗതുകത്തോടും കൂടെ നേഹ പാൽ കറന്നെടുത്തു. ഒപ്പമുണ്ടായിരുന്ന സുഹൃത്തും എരുമയെ കറക്കുന്നതിന്റെ ദൃശ്യങ്ങൾ വിഡിയോയിൽ കാണാനാകും. പാൽ നിറച്ച ബക്കറ്റുമായി കൂട്ടുകാരിയുടെ കയ്യും പിടിച്ച് നേഹ അവിടെ നിന്നും പോകുന്നതും കാണാം.
നേഹയുടെ ഈ വ്യത്യസ്തമായ വിഡിയോ ആരാധകർക്കു പുത്തൻ അനുഭവമാവുകയാണ്. ഇതിനോടകം നിരവധി പേരാണു വിഡിയോ കണ്ടത്. രസകരമായ പ്രതികരണങ്ങളും ലഭിക്കുന്നുണ്ട്. ആരാധകരിൽ പലരും വിഡിയോ പങ്കുവയ്ക്കുകയുമുണ്ടായി.