പുണ്യം നിറച്ച് ‘മനസ്സാം പൊന്നമ്പലം’; സംഗീത ആൽബം ശ്രദ്ധേയം

‘മനസ്സാം പൊന്നമ്പലം’ എന്ന പേരിൽ പുറത്തിറക്കിയ പുതിയ അയ്യപ്പഭക്തിഗാനം ശ്രദ്ധേയമാകുന്നു. പ്രവാസിയായ ഗാനരചയിതാവ് മേതിൽ സതീശൻ ആണ് പാട്ടിനു വരികൾ കുറിച്ചത്. ഗോകുൽ മേനോൻ സംഗീതസംവിധാനം നിർവഹിച്ചിരിക്കുന്നു. സതീശൻ തന്നെയാണ് ഗാനം ആലപിച്ചിരിക്കുന്നത്. ശശി വള്ളിക്കാട് പശ്ചാത്തലസംഗീതമൊരുക്കി.

മണ്ഡലകാലത്തിന്റെ പുണ്യം വിളിച്ചോതുന്ന ‘മനസ്സാം പൊന്നമ്പലം’ ചുരുങ്ങിയ സമയത്തിനകം ശ്രദ്ധേയമായി. മികച്ച പ്രതികരണങ്ങളാണു പാട്ടിനു സമൂഹമാധ്യമങ്ങളിൽ നിന്നും ലഭിക്കുന്നത്. നിരവധി പേർ പാട്ട് പങ്കുവയ്ക്കുകയുമുണ്ടായി. ശബരിമല ദൃശ്യങ്ങൾ കൂടി ഉൾപ്പെടുത്തിക്കൊണ്ടാണ് പാട്ട് പ്രേക്ഷകർക്കരികിലെത്തിയത്. ഹൃദയതൂലിക ക്രിയേഷൻസ് ആണ് പാട്ടിന്റെ നിർമാണം.