ഇനി ആറു മാസം മാത്രം. ലോക സംഗീത ആരാധകർ ഒരിക്കലും ഡിസംബർ മാസത്തെ ഇത്ര ഭീതിയോടെ കാത്തിരുന്നിട്ടില്ല. കൊറിയൻ പോപ് ബാൻഡ് ആയ ബിടിഎസിലെ മുതിർന്ന താരം ചിൻ 30 വയസ്സ് തികയ്ക്കുകയാണ് ഡിസംബർ നാലിന്. ദക്ഷിണ കൊറിയയിലെ നിയമം അനുസരിച്ച് അദ്ദേഹം നിർബന്ധിത സൈനികസേവനത്തിനു പോകേണ്ട പ്രായം. ബിടിഎസ് അംഗങ്ങൾ നിർബന്ധിത സൈനിക സേവനത്തിനു പോകേണ്ടി വരുമോ ഇല്ലയോ എന്ന കാര്യത്തിൽ ഇനിയും തീരുമാനമാകാത്തത് ആരാധകർക്കിടയിൽ ഉത്കണ്ഠയും ആകാംക്ഷയും സൃഷ്ടിക്കുകയാണ്. കൊറിയൻ പാർലമെന്റിൽ അടക്കം വിഷയം ചൂടേറിയ ചർച്ചയ്ക്കു വഴിവച്ചിരിക്കുന്നു.
