‘അത് എന്റെ നിർഭാഗ്യവും ജീവിതത്തിലെ വലിയ പരാജയവുമായിരുന്നു’; വേദനകൾക്കപ്പുറം വീണ്ടും മൂക്കുത്തിയണിഞ്ഞ് അഭയ, അക്കഥ
Mail This Article
മൂക്ക് കുത്തുന്നതിന്റെ വിഡിയോ പങ്കുവച്ച് ഗായിക അഭയ ഹിരൺമയി. ഇത് രണ്ടാം തവണയാണ് മൂക്ക് കുത്തുന്നതെന്നും ആദ്യത്തേത് ജീവിതത്തിലെ തന്നെ വലിയ പരാജയമായിരുന്നുവെന്നും അഭയ വിഡിയോയ്ക്കൊപ്പം കുറിച്ചു. എറണാകുളത്തെ നേറ്റീവ് ഇങ്ക്ബ്ലോട്ട് ടാറ്റൂസിൽ നിന്നാണ് ഗായിക മൂക്ക് കുത്തിയത്. മൂക്കിന്റെ ഇരുവശവും കുത്തി അഭയ മൂക്കുത്തിയണിഞ്ഞു.
വിഡിയോയ്ക്കൊപ്പം ഗായിക കുറിച്ചതിങ്ങനെ: ‘ഇത് രണ്ടാം തവണയാണ് ഞാൻ എന്റെ മൂക്കിന്റെ വലതു വശം കുത്തുന്നത്. രണ്ട് വർഷം മുൻപ് മീനാക്ഷി ക്ഷേത്രത്തിൽ വച്ചായിരുന്നു ആദ്യമായി മൂക്കുത്തി അണിഞ്ഞത്. അത് പക്ഷേ ജീവിതത്തിലെ വലിയ പരാജയമായിരുന്നു. അത് നിർഭാഗ്യകരവുമായിരുന്നുവെന്നു ഞാൻ വിശ്വസിക്കുന്നു. എന്റെ ജീവിതത്തിലെ എല്ലാ പ്രധാനപ്പെട്ട ചടങ്ങുകളും നടന്നത് ഇന്ത്യയിലെ വിവിധ ക്ഷേത്രങ്ങളിൽ വച്ചു തന്നെയാണ്. അച്ഛൻ അതേക്കുറിച്ച് ഇടയ്ക്കിടെ പറയുമായിരുന്നു.
മധുര മീനാക്ഷി ക്ഷേത്രത്തിൽ വച്ചായിരുന്നു എന്റെ കാതുകുത്ത്. പഴനിയിൽ വച്ച് ആദ്യമായി തല മൊട്ടയടിച്ചു. ബാക്കിയൊന്നും എനിക്കോർമയില്ല. ഇപ്പോൾ ഞങ്ങളുടെ കാതുകുത്തും മൂക്ക് കുത്തുമൊക്കെ നടക്കുന്നത് നേറ്റീവ് ഇങ്ക്ബ്ലോട്ട് ടാറ്റൂ സ്റ്റുഡിയോയിൽ ആണ്. ഇവിടം ഞങ്ങളുടെ കുടുംബക്ഷേത്രം പോലെയായിരിക്കുന്നു. ഒരുപാട് സ്നേഹവും നന്ദിയും’.
അഭയ ഹിരൺമയി പങ്കുവച്ച വിഡിയോ ഇതിനകം ആരാധകശ്രദ്ധ നേടിക്കഴിഞ്ഞു. നിരവധി പേരാണു പ്രതികരണങ്ങളുമായി എത്തുന്നത്. അഭയയ്ക്കു സമൂഹമാധ്യമങ്ങളിൽ നിരവധി ആരാധകരുണ്ട്.