അൽഫോൻസ് പുത്രന്റെ ഭാര്യയ്ക്കൊപ്പം മീനാക്ഷി ദിലീപ്; ചടുലമായ ചുവടുകൾക്കു കയ്യടി, വിഡിയോ

അതിമനോഹര നൃത്ത വിഡിയോയുമായി ദിലീപിന്റെ മകൾ മീനാക്ഷി. സംവിധായകൻ അൽഫോൻസ് പുത്രന്റെ ഭാര്യ അലീനയ്ക്കൊപ്പമാണ് മീനാക്ഷിയുടെ തകർപ്പൻ ഡാൻസ്. സമൂഹമാധ്യമങ്ങളിൽ തരംഗമായ ‘രാഞ്ജന‌’ എന്ന ഹിന്ദി ഗാനവും ‘വളയപ്പട്ടി’ എന്ന തമിഴ് ഗാനവും കോർത്തിണക്കിയുള്ള റീമിക്‌സിനൊപ്പമാണ് ഇരുവരുടെയും പ്രകടനം. 

അലീന സമൂഹമാധ്യമങ്ങളിൽ പങ്കുവച്ച വിഡിയോ ചുരുങ്ങിയ സമയം കൊണ്ടു ശ്രദ്ധേയമായിക്കഴിഞ്ഞു. നസ്രിയ നസീം, അപർണ ബാലമുരളി തുടങ്ങി പ്രമുഖർ ഉൾപ്പെടെ നിരവധി പേർ പ്രതികരണങ്ങളറിയിക്കുന്നുണ്ട്. അൽഫോൻസ് പുത്രനാണ് നൃത്ത വിഡിയോയുടെ എഡിറ്റിങ് നിർവഹിച്ചത്. ഐശ്വര്യ അശോക് രംഗങ്ങൾ ചിത്രീകരിച്ചു. 

മുൻപും നൃത്ത വിഡിയോകളിലൂടെ ആരാധകമനം കവർന്നിട്ടുണ്ട് മീനാക്ഷി ദിലീപ്. ബാല്യകാല സുഹൃത്തും നാദിർഷയുടെ മകളുമായ ആയിഷയുടെ വിവാഹ സൽക്കാരത്തിന് മീനാക്ഷിയും നമിത പ്രമോദും ചേർന്നവതരിപ്പിച്ച നൃത്തം വൈറലായിരുന്നു. അലീനയും നൃത്തരംഗത്തു സജീവമാണ്. അടുത്തിടെ നസ്രിയയ്ക്കൊപ്പം ചുവടുവച്ചതിന്റെ വിഡിയോ ഏറെ ശ്രദ്ധിക്കപ്പെട്ടിരുന്നു.