ഷെയ്ൻ നിഗം നായകനായെത്തിയ ആർഡിഎക്സിലെ ‘നീല നിലവെ’ പാട്ടിനൊപ്പം ചുവടുവച്ച് നടി നവ്യ നായർ. സമൂഹമാധ്യമങ്ങളിൽ പങ്കുവച്ച വിഡിയോ ചുരുങ്ങിയ സമയം കൊണ്ടു ശ്രദ്ധേയമായിക്കഴിഞ്ഞു. ‘തുടക്കം കുറച്ചു മോശമായെങ്കിലും അവസാനം ഒട്ടും മെച്ചപ്പെടാത്തതുകൊണ്ട് കുഴപ്പമില്ലല്ലോ അല്ലെ?’ എന്നു രസകരമായി കുറിച്ചുകൊണ്ടാണ് നവ്യയുടെ പോസ്റ്റ്. ആര്‍ഡിഎക്സ് മനോഹരമായ സിനിമയാണെന്നും ഷെയ്ൻ ഭംഗിയായി ഡാൻസ് ചെയ്‍തിട്ടുണ്ടെന്നും നവ്യ കൂട്ടിച്ചേർത്തു.
നവ്യയുടെ വിഡിയോയ്ക്കു താഴെ നിരവധി പേരാണു പ്രതികരണങ്ങൾ അറിയിച്ചെത്തുന്നത്. നടിയുടെ രസകരമായ അടിക്കുറിപ്പാണ് പലരെയും ആകർഷിച്ചത്. സമൂഹമാധ്യമങ്ങളില്‍ തരംഗമായതാണ് ‘നീല നിലവേ’ ഗാനം. ഷെയ്ൻ നിഗവും മഹിമ നമ്പ്യാരും തകർപ്പൻ പ്രകടനം കാഴ്ചവച്ച ഗാനം ഒരു കോടിയിലേറെ പ്രേക്ഷകരെയും വാരിക്കൂട്ടി. മനു മഞ്ജിത് ആണ് പാട്ടിനു വരികൾ കുറിച്ചത്. സാം സി.എസ് ചിട്ടപ്പെടുത്തിയ ഗാനം കപിൽ കപിലൻ ആലപിച്ചു.
ഷെയ്ന്‍ നിഗം, ആന്‍റണി വര്‍ഗീസ്, നീരജ് മാധവ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ നഹാസ് ഹിദായത്ത് സംവിധാനം ചെയ്ത ചിത്രമാണ് ആർഡിഎക്സ്. ചിത്രം വിജയകരമായി പ്രദർശനം തുടരുകയാണ്.
