ബോംബെ ജയശ്രീയുടെ മകന്റെ ഈണത്തിൽ പാടി വിനീത് ശ്രീനിവാസൻ; ആടിത്തിമിർത്ത് പ്രണവ്

വിനീത് ശ്രീനിവാസനും പ്രണവ് മോഹൻലാലും ഒന്നിക്കുന്ന ‘വർഷങ്ങൾക്കു ശേഷം’ എന്ന ചിത്രത്തിലെ ഗാനം യൂട്യൂബിൽ തരംഗമാകുന്നു. ‘മധു പകരൂ’ എന്നു തുടങ്ങുന്ന പാട്ടിനു വരികൾ കുറിച്ച് ആലപിച്ചത് വിനീത് ശ്രീനിവാസനാണ്. ഗായിക ബോംബെ ജയശ്രീയുടെ മകൻ അമൃത് രാംനാഥ് പാട്ട് ചിട്ടപ്പെടുത്തി. ‘മധു പകരൂ’ ഇതിനകം പ്രേക്ഷകർ ഏറ്റെടുത്തുകഴിഞ്ഞു. 3 മില്യനിലേറെ കാഴ്ചക്കാരെ നേടിയ ഗാനം ട്രെൻഡിങ്ങിലും മുൻനിരയിലുണ്ട്. 

ഹൃദയത്തിനു ശേഷം വിനീത് ശ്രീനിവാസനും പ്രണവ് മോഹൻലാലും ഒന്നിക്കുന്ന ചിത്രമാണ് ‘വർഷങ്ങൾക്കു ശേഷം’. ഹൃദയം നിർമിച്ച മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യം തന്നെയാണ് ‘വർഷങ്ങൾക്കു ശേഷം’ നിർമിക്കുന്നത്. 

വിനീത് ശ്രീനിവാസൻ തന്നെ തിരക്കഥ ഒരുക്കുന്ന ചിത്രത്തിൽ പ്രണവിനെ കൂടാതെ ധ്യാൻ ശ്രീനിവാസൻ, അജു വർഗീസ്, കല്യാണി പ്രിയദർശൻ, ബേസിൽ ജോസഫ്, നീരജ് മാധവ്, നീത പിള്ളൈ, അർജുൻ ലാൽ, നിഖിൽ നായർ, ഷാൻ റഹ്മാൻ തുടങ്ങിയവരും വേഷമിടുന്നു. നിവിൻ പോളിയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഏപ്രിൽ 11ന് ചിത്രം പ്രദർശനത്തിനെത്തും.