തിരുവള്ളുവരെ കാവിയണിയിച്ച് ഗവർണർ; എതിർത്ത് സ്റ്റാലിൻ

ചെന്നൈ ∙ കാവി വസ്ത്രം ധരിച്ച തിരുവള്ളുവരുടെ ചിത്രം പങ്കുവച്ച് സനാതന പാരമ്പര്യമുള്ള സന്യാസിയെന്ന് വിശേഷിപ്പിച്ച തമിഴ്നാട് ഗവർണർ ആർ.എൻ.രവിയെ മുഖ്യമന്ത്രി എം.കെ.സ്റ്റാലിൻ രൂക്ഷമായി വിമർശിച്ചു. ആദരണീയനായ കവിയും മഹാനായ തത്ത്വചിന്തകനും ഭാരതീയ സനാതന പാരമ്പര്യത്തിലെ ഏറ്റവും തിളക്കമുള്ള സന്യാസിയുമായ തിരുവള്ളുവർ എന്ന ഗവർണറുടെ വിശേഷണമാണ് വിവാദമായത്. കാവി ധരിച്ച കവിയുടെ ചിത്രത്തിൽ പുഷ്പാർച്ചന നടത്തുന്ന ചിത്രവും പുറത്തുവിട്ടിരുന്നു. എന്നാൽ, തിരുവള്ളുവരെ അപകീർത്തിപ്പെടുത്താൻ ആർക്കും കഴിയില്ലെന്ന് സ്റ്റാലിൻ പറഞ്ഞു. തിരുക്കുറലിനെക്കുറിച്ചും തിരുവള്ളുവരെക്കുറിച്ചും ഗവർണർക്ക് അടിസ്ഥാന ധാരണയില്ലെന്ന് കനിമൊഴി എംപിയും അഭിപ്രായപ്പെട്ടു.