ശബരിമല: തിരക്കു നിയന്ത്രണം‌ ഉറപ്പാക്കണമെന്ന് ഹൈക്കോടതി

കൊച്ചി ∙ ശബരിമലയിൽ തിരക്കു നിയന്ത്രിക്കാനുള്ള നടപടികൾ ഉറപ്പാക്കാൻ ഹൈക്കോടതി നിർദേശം നൽകി. അവധി ദിവസം സ്പെഷൽ സിറ്റിങ് നടത്തിയാണു സന്നിധാനം ചീഫ് പൊലീസ് കോ–ഓർഡിനേറ്റർ, തിരുവിതാംകൂർ ദേവസ്വം ബോർഡ് സ്പെഷൽ ഓഫിസർ, സ്പെഷൽ കമ്മിഷണർ ഓഫിസിലെ എക്സിക്യൂട്ടീവ് മജിസ്ട്രേട്ട് എന്നിവർക്കു ദേവസ്വം ബെഞ്ച് ഈ നിർദേശം നൽകിയത്.

ദർശനസമയം ഒന്നോ രണ്ടോ മണിക്കൂർ കൂട്ടാനാവുമോയെന്നു തന്ത്രിയോടു ചോദിച്ചറിയാൻ ജസ്റ്റിസ് അനിൽ കെ.നരേന്ദ്രൻ, ജസ്റ്റിസ് പി.ജി.അജിത് കുമാർ എന്നിവരുൾപ്പെട്ട ബെഞ്ച് നിർദേശം നൽകിയിരുന്നു. നിലവിൽ ദർശന സമയം പുലർച്ചെ 3 മുതൽ ഉച്ചയ്ക്ക് 1 വരെയും 4 മുതൽ 11 വരെയുമായി 17 മണിക്കൂറാണ്. ഇതു കൂട്ടാനാവില്ലെന്നു തന്ത്രി അറിയിച്ചതായി ദേവസ്വം ബോർഡ് ഹൈക്കോടതിയെ അറിയിച്ചു.