ഇടുക്കിയിൽ കാട്ടാനക്കൂട്ടം 50 ഏക്കർ ഏലത്തോട്ടം നശിപ്പിച്ചു; വൻ നഷ്ടം

മൂന്നാർ ∙ ഇടമലക്കുടിയിൽ ഗോത്രവർഗക്കാരുടെ 50 ഏക്കർ ഭൂമിയിലെ ഏലക്കൃഷി കാട്ടാനകൾ നശിപ്പിച്ചു. ഷെഡ്ഡുകുടി, കണ്ടത്തിക്കുടി നിവാസികളായ പാർവതി, ശ്രീധരൻ, മഹാരാജ്, രാജു, തങ്കപ്പൻ എന്നിവരുടെ ഏലത്തോട്ടമാണ് 5 കാട്ടാനകളുടെ സംഘം ചവിട്ടി നശിപ്പിച്ചത്. അഞ്ചു ലക്ഷത്തിലധികം രൂപയുടെ ഏലയ്ക്ക നഷ്ടപ്പെട്ടെന്നാണു കണക്ക്. 

ഒരാഴ്ചയായി ഈ മേഖലയിൽ കാട്ടാനശല്യം രൂക്ഷമാണ്. പകൽ സമയങ്ങളിൽ ഉൾപ്പെടെ കാട്ടാനക്കൂട്ടം ജനവാസമേഖലയ്ക്കു സമീപമുള്ള കൃഷിയിടത്തിൽ കറങ്ങി നടക്കുന്നതിനാൽ ഗോത്രവർഗക്കാർക്കു വീടുകൾക്കു പുറത്തിറങ്ങാനോ കൃഷിയിടത്തിലേക്കു പോകാനോ കഴിയാത്ത അവസ്ഥയാണ്. രണ്ടാഴ്ച മുൻപു സൊസൈറ്റിക്കുടിയിലെ പഞ്ചായത്ത് ഓഫിസും ട്രൈബൽ ഹോസ്റ്റലും കാട്ടാനക്കൂട്ടം തകർത്തിരുന്നു.