സീറ്റ് നിഷേധിച്ചു; പരീക്കറുടെ മകൻ ബിജെപി വിട്ടു, സ്വതന്ത്രനായി മത്സരിക്കും

പനജി∙ ഗോവ നിയമസഭാ തിരഞ്ഞെടുപ്പില്‍ പനജി നിയമസഭാ സീറ്റിൽ മത്സരിക്കുന്നതിൽനിന്ന് ഒഴിവാക്കിയതിനു പിന്നാലെ ഗോവ മുൻ മുഖ്യമന്ത്രി മനോഹർ പരീക്കറിന്റെ മകൻ ഉത്പൽ പരീക്കർ ബിജെപിയിൽനിന്നു രാജിവച്ചു. പനജി സീറ്റിൽനിന്ന് സ്വതന്ത്രനായി മത്സരിക്കുമെന്ന് ഉത്പൽ അറിയിച്ചു.

‘‘എന്റെ മൂല്യങ്ങൾക്കായി നിലപാട് സ്വീകരിക്കേണ്ട സമയമായി. പനജി മണ്ഡലത്തിലെ സ്ഥാനാർഥിത്വം ലഭിച്ചില്ല. പക്ഷേ, പാർട്ടിയിൽ അവസരോചിതമായി വന്ന ഒരാൾക്ക് സ്ഥാനാർഥിത്വം നൽകി. രാഷ്ട്രീയ വിധി എന്താണെന്ന് പനജിയിലെ ജനം തീരുമാനിക്കട്ടെ.’’ – അദ്ദേഹം പറഞ്ഞു. മനോഹർ പരീക്കറിന്റെ മണ്ഡലമായിരുന്നു പനജി. മൂന്ന് തവണ ഗോവ മുഖ്യമന്ത്രിയായ അദ്ദേഹം 2019-ൽ അധികാരത്തിലിരിക്കെയാണ് അന്തരിച്ചത്. 

English Summary: Manohar Parrikar's Son, Denied Ticket From Father's Goa Seat, Quits BJP