ബിജെപി എംഎൽഎയുടെ സഹായിയുടെ വീട്ടിൽനിന്ന് 1.20 കോടിയും 100 പവനും പിടിച്ചു

ചെന്നൈ ∙ കർണാടക ബിജെപി എംഎൽഎ ബൈരതി ബസവരാജിന്റെ സഹായിയുടെ വീട്ടിൽ നിന്ന് 1.20 കോടി രൂപയും 100 പവൻ സ്വർണാഭരണങ്ങളും ആദായ നികുതി ഉദ്യോഗസ്ഥർ പിടികൂടി. കർണാടകയിലെ കെആർ പുരം എംഎൽഎ ആയ ബൈരതിയുടെ പിഎ മഞ്ജുനാഥിന്റെ മരുമകനും കൃഷ്ണഗിരിയിലെ ക്രഷർ യൂണിറ്റ് ഉടമയുമായ ലോകേഷ് കുമാറിന്റെ വീട്ടിൽ നിന്നാണ് കണക്കിൽപ്പെടാത്ത തുകയും ആഭരണങ്ങളും പിടിച്ചെടുത്തത്. 

ഹൊസൂരിൽനിന്ന് ബെംഗളൂരുവിലേക്കു പോകുകയായിരുന്ന ലോകേഷിന്റെ കാർ പരിശോധിച്ച ഫ്ലയിങ് സ്ക്വാഡ് ഉദ്യോഗസ്ഥർ വാഹനത്തിൽ നിന്ന് 10 ലക്ഷം രൂപ പിടിച്ചെടുത്തിരുന്നു. ഫ്ലയിങ് സ്ക്വാഡ് നൽകിയ വിവരത്തെ തുടർന്ന് ആദായ നികുതി വകുപ്പ് ഉദ്യോഗസ്ഥർ ഇയാളുടെ വീട്ടിൽ നടത്തിയ പരിശോധനയിലാണ് പണവും ആഭരണങ്ങളും കണ്ടെത്തിയത്.