ഒരു ഗുണ്ടയെ രക്ഷിക്കാൻ എന്റെ വ്യക്തിത്വത്തെ ചോദ്യം ചെയ്യുന്നു: അതിഷിക്ക് മറുപടിയുമായി സ്വാതി

ന്യൂഡൽഹി ∙ അരവിന്ദ് കേജ്‌രിവാളിന്റെ പിഎ ബൈഭവ് കുമാറിനെതിരെയുള്ള ആരോപണം ബിജെപി ഗൂഢാലോചനയെന്ന ഡൽഹി മന്ത്രി അതിഷിയുടെ ആരോപണത്തിൽ മറുപടിയുമായി സ്വാതി മലിവാൾ എംപി. ഒരു ഗുണ്ടയെ രക്ഷിക്കാൻ തന്റെ വ്യക്തിത്വത്തെ ചോദ്യം ചെയ്യുകയാണ് അതിഷിയെന്ന് സ്വാതി പറഞ്ഞു.

‘‘ഇന്നലെ വന്ന ചില നേതാക്കൾ 20 വർഷമായി പാർട്ടി പ്രവർത്തകയായ എന്നെ ബിജെപിയുടെ ഏജന്റാക്കുന്നു. രണ്ടു ദിവസം മുൻപ് സത്യം അംഗീകരിച്ച പാർട്ടി ഇന്ന് യൂ–ടേൺ എടുത്തു. എന്നെ അറസ്റ്റ് ചെയ്താൽ എല്ലാ രഹസ്യവും വെളിപ്പെടുത്തുമെന്ന് ഈ ഗുണ്ട പാർട്ടിയെ ഭീഷണിപ്പെടുത്തുകയാണ്. അതുകൊണ്ടാണ് അയാൾ ലക്നൗവിലും മറ്റെല്ലായിടത്തും അഭയം തേടി അലയുന്നത്.

ഇന്ന് അയാളുടെ സമ്മർദം കാരണം പാർട്ടി ഒരു ഗുണ്ടയ്ക്ക് സംരക്ഷണം നൽകുകയും എന്റെ വ്യക്തിത്വത്തെ ചോദ്യം ചെയ്യുകയും ചെയ്യുന്നു. അതിൽ വിഷമമില്ല. ഈ രാജ്യത്തെ സ്ത്രീകൾക്കു വേണ്ടിയും എനിക്കുവേണ്ടിയും ഞാൻ ഒറ്റയ്ക്ക് പൊരുതും. എത്രത്തോളം വ്യക്തിഹത്യ വേണമെങ്കിലും നടത്തിക്കോളൂ. സമയമാകുമ്പോൾ സത്യം പുറത്തുവരും’– സ്വാതി എക്സിൽ കുറിച്ചു.