എക്കാലത്തെയും മികച്ച ചലച്ചിത്രങ്ങളുടെ പട്ടികയില്‍ ബംഗാളി ചിത്രം പഥേര്‍ പാഞ്ചലി (പാതയുടെ പാട്ട്) ഇടം നേടുന്നത് ഇതാദ്യമായല്ല. സിനിമകളുടെ എണ്ണം വളരെ കുറവായിരുന്ന കാലത്ത് മികച്ച പത്തു ലോകസിനിമകളുടെ പട്ടികയില്‍ ഒന്നായിപ്പോലും ചില നിരൂപകര്‍ ഈ ചിത്രത്തെ ഉള്‍പ്പെടുത്തിയിരുന്നു. ഇപ്പോഴിതാ ടൈം മാഗസിനു വേണ്ടി വിഖ്യാത ചലച്ചിത്ര നിരൂപക സ്റ്റെഫനി സാക്കറക്ക് തയാറാക്കിയ, നൂറു വര്‍ഷത്തെ മികച്ച ലോക സിനിമകളുടെ പട്ടികയില്‍ ഇടം നേടിയ ഏക ഇന്ത്യന്‍ ചിത്രമായിരിക്കുന്നു പഥേര്‍ പാഞ്ചലി. ബംഗാളി ഭാഷയിലെ ഒരു കഥാഗീതികയാണ് പാഞ്ചലി. പ്രത്യേക ഈണത്തില്‍ പാടുന്ന പാട്ടുശൈലി എന്നും പറയാം. ആഗോള തലത്തില്‍ നിരൂപക ശ്രദ്ധ പിടിച്ചുപറ്റിയ ആദ്യ ഇന്ത്യന്‍ ചിത്രമാണ് ബിഭൂതി ഭൂഷണ്‍ ബന്ദോപാധ്യായയുടെ നോവലിലെ ആദ്യ രണ്ട് അധ്യായങ്ങളെ അവലംബിച്ച് സത്യജിത് റായ് സംവിധാനം ചെയ്ത പഥേര്‍ പാഞ്ചലി.
