ഐൻസ്റ്റൈൻ പറഞ്ഞത്

ആൽബെർട്ട് ഐൻസ്റ്റൈൻ  ഇരുപതാം നൂറ്റാണ്ടിൽ ജീവിച്ചിരുന്നവരിൽ ഏറ്റവും വലിയ ബുദ്ധിമാൻമാരിൽപ്പെടുന്നു. 1879ൽ ജർമനിയിൽ ജനിച്ച് 1955ൽ യുഎസ്സിൽ 76–ാം വയസ്സിൽ അന്തരിച്ച ആ അസാമാന്യ പ്രതിഭാശാലി 1921ൽ ഫിസിക്സിനുള്ള നൊബേൽ സമ്മാനം നേടിയത് ഏവർക്കുമറിയാം. പക്ഷേ പലരും കരുതുന്നതുപോലെ അത് അദ്ദേഹത്തിന്റെ വിശ്രുതമായ ആപേക്ഷികസിദ്ധാന്തത്തിനായിരുന്നില്ല, സൈദ്ധാന്തിക ഊർജ്ജതന്ത്രത്തിനു നല്കിയ സംഭാവനയ്ക്കും, വിശേഷിച്ച് ഫോട്ടോ–ഇലക്ട്രിക് ഇഫക്റ്റ് നിയമത്തിന്റെ കണ്ടുപിടിത്തത്തിനുമായിരുന്നു സമ്മാനം. പിണ്ഡവും (mass) ഊർജ്ജവും തമ്മിലുള്ള ബന്ധത്തെ സൂചിപ്പിക്കുന്ന E = mc2 ലോകത്തിലെ ഏറ്റവും പ്രശസ്തമായ ഫോർമുലയായിത്തീർന്നു.