ഏതു സാഹചര്യത്തിലും നേട്ടം ഉറപ്പാക്കും ഈ ഫണ്ടുകൾ

ഓരോ കാലഘട്ടത്തിലും നിക്ഷേപകർക്കു മുന്നിൽ അവസരങ്ങളും വെല്ലുവിളികളും സൃഷ്ടിച്ചുകൊണ്ടാണ് ഓഹരിവിപണി മുന്നേറുന്നത്. അതുകൊണ്ടുതന്നെ ചാഞ്ചാട്ടങ്ങൾ ഉണ്ടാകുമ്പോൾ സ്ഥിരതയും വളർച്ചയും നൽകുന്ന നിക്ഷേപങ്ങളാവും എല്ലാവരും തേടുക. അത്തരത്തിൽ, എടുക്കുന്ന റിസ്കിനനുസരിച്ചു നേട്ടം നൽകുന്ന മ്യൂച്വൽ ഫണ്ട് വിഭാഗമാണ് ലാർജ് & മിഡ്‌ക്യാപ് ഇക്വിറ്റി ഫണ്ടുകള്‍. വിവിധ കമ്പനികളുടേതായി 26 ഓളം സ്കീമുകളും 1.75 ലക്ഷം കോടി രൂപയിലധികം നിക്ഷേപമുള്ള ഈ വിഭാഗം ഫണ്ടുകൾ എന്നും നിക്ഷേപകരെ ആകർഷിക്കുന്നു.

എന്തുകൊണ്ട് ഇപ്പോൾ? 
നിലവിലെ വിപണി സാഹചര്യങ്ങൾ, മുൻപെങ്ങുമില്ലാത്തതരത്തിൽ സന്തുലിതമായ ഒരു നിക്ഷേപരീതി ആവശ്യപ്പെടുന്നുണ്ട്. അതുറപ്പാക്കാൻ പറ്റുന്നവയാണ് ലാർജ് & മിഡ്ക്യാപ് മ്യൂച്വൽ ഫണ്ടുകൾ. ലാർജ് ക്യാപ് ഓഹരികളുടെ സ്ഥിരതയും മിഡ്ക്യാപ് ഓഹരികളുടെ വളർച്ചാ സാധ്യതയും ഒന്നുചേരുന്ന ഈ ഫണ്ടുകൾ സന്തുലനം ഉറപ്പാക്കും. പോർട്ട്ഫോളിയോയുടെ വൈവിധ്യവൽക്കരണത്തിനും ഈ ഫണ്ടുകൾ അനുയോജ്യമാണ്. രണ്ടു വിഭാഗം ഓഹരികളിൽ നിക്ഷേപിക്കുന്നതുകൊണ്ടുതന്നെ ചാഞ്ചാട്ടത്തിന്‍റെ സമയത്തും ആകർഷകമായ നേട്ടം ഉറപ്പാക്കാൻ ഫണ്ട് മാനേജർക്കു സാധിക്കും. ഈ ഫണ്ടുകളിലൂടെ നിക്ഷേപകന്റെ റിസ്കും വലിയതോതിൽ കുറയും. അതുകൊണ്ടു കുറഞ്ഞ റിസ്കിൽ മികച്ച നേട്ടം ആഗ്രഹിക്കുന്നവർക്ക് ഏറ്റവും മികച്ച വിഭാഗമാണ് ലാർജ് & മിഡ്ക്യാപ് ഫണ്ടുകൾ. 

ഈ ഫണ്ടിലെ നിക്ഷേപത്തിന്റെ 35 % വീതം ലാർജ്‌ക്യാപ്, മിഡ്‌ക്യാപ് ഓഹരികളിൽ നിക്ഷേപിച്ചിരിക്കണം. ബാക്കിയുള്ള 30 % ഓഹരികൾ, ഫണ്ടു സ്വീകരിക്കുന്ന നിക്ഷേപ തന്ത്രങ്ങൾക്കനുസരിച്ചു തിരഞ്ഞെടുക്കാം. ഈ വിഭാഗത്തിൽ മികച്ച നേട്ടം നൽകുന്ന ഒട്ടേറെ ഫണ്ടുകൾ ലഭ്യമാണ്. കഴിഞ്ഞ ഒരു വർഷ കാലയളവിൽ നിക്ഷേപത്തിനു ശരാശരി 30 % റിട്ടേൺ നൽകാൻ ലാർജ് & മിഡ്ക്യാപ് ഫണ്ടുകൾക്കു സാധിച്ചിട്ടുണ്ട്. മൂന്നു വർഷത്തിൽ 22ഉം അഞ്ചു വർഷത്തിൽ 17.9 ഉം ശതമാനം നേട്ടം നൽകി മികച്ച പ്രകടനവും കാഴ്ചവച്ചു. എസ്‌ഐ‌പി നിക്ഷേപങ്ങളും മികച്ച നേട്ടമാണു നൽകിവരുന്നത്. ഈ വിഭാഗത്തിൽ ദീർഘകാലമായി മികച്ച പ്രകടനം കാഴ്ചവയ്ക്കുന്ന ഒരു ഫണ്ടാണ് ഐസിഐസിഐ പ്രുഡൻഷ്യൽ ലാർജ് & മിഡ്‌ക്യാപ് ഫണ്ട്. നിക്ഷേപം നടത്തുംമുൻപ് നിങ്ങളുടെ സാമ്പത്തിക ലക്ഷ്യങ്ങളും അവ നേടിയെടുക്കേണ്ട കാലയളവും പരിഗണിക്കണം •

(മ്യൂച്വൽ ഫണ്ട് ഡിസ്ട്രിബ്യൂട്ടറാണ് ലേഖകൻ. മനോരമ സമ്പാദ്യം ഫെബ്രുവരി ലക്കത്തിൽ പ്രസിദ്ധീകരിച്ചത്)