അർജന്റീന കിളിപോയ ഹൈലൈൻ; ഉശിരൻ സ്ട്രൈക്കറില്ല: ഒത്തിണക്കം പോരാ കളിക്കണം

പരിശീലകനായി വലിയ പരിചയസമ്പത്തില്ലാത്ത സ്കലോനിയുടെ ഏറ്റവും വലിയ സംഭാവനയായി പറയേണ്ടതു അർജന്റീനയിൽ ഒത്തിണക്കവും ടീം ഗെയിമും തിരിച്ചുകൊണ്ടുവന്നു എന്നതാണ്. എന്നാൽ ലോകകപ്പ് പോലൊരു ഉന്നത വേദിയിൽ ടാക്ടിക്കൽ ആയുള്ള ഇടപെടൽ അതിവേഗം വേണ്ടിവരും. പക്ഷേ, സൗദിക്കെതിരെ അതുണ്ടായില്ല അല്ലെങ്കിൽ വൈകിപ്പോയി എന്നു വ്യക്തം. എതിരാളികൾ മുന്നേറ്റക്കാരെ ഹൈലൈനിൽ തളച്ചിടുമ്പോൾ അതിവേഗക്കാരനായൊരു താരത്തെ ഇറക്കി അതു പൊളിക്കുക എന്നതാകും പരിശീലകർ പ്രയോഗിക്കുന്ന പ്രഥമതന്ത്രം. അർജന്റീന സ്ക്വാഡിലെ മുന്നേറ്റക്കാരിൽ വേഗക്കാരനെന്നു പറയാവുന്നൊരാൾ പൗളോ ഡിബാലയാണ്. ഇറ്റാലിയൻ സീരി എയിൽ ഹോസെ മൗറീഞ്ഞോയുടെ എഎസ് റോമയുടെ വജ്രായുധമായ ഡിബാലയെ പക്ഷേ, സ്കലോനി പരിഗണിച്ചുമില്ല.