വെൽക്കം ടു സൗദി; അൽ ഹിലാലിനെതിരെ മെസ്സിയുടെ ഇന്റർ മയാമിക്ക് തോൽവി

റിയാദ് ∙ വൻതുക വാഗ്ദാനം ചെയ്തിട്ടും ക്ലബ്ബിലേക്കു വരാതിരുന്ന ലയണൽ മെസ്സിക്ക് അൽ ഹിലാൽ ക്ലബ്ബിന്റെ വക ചെറിയൊരു ‘സമ്മാനം’. പ്രീസീസൺ സൗഹൃദ ഫുട്ബോൾ മത്സരത്തിൽ മെസ്സിയുടെ ഇന്റർ മയാമി ക്ലബ്ബിനെ അൽ ഹിലാൽ 4–3നു തോൽപിച്ചു. റിയാദിലെ കിങ്ഡം അരീനയിൽ ആദ്യ 15 മിനിറ്റിൽ തന്നെ 2–0നു പിന്നിലായ മയാമി പിന്നീട് ലൂയി സ്വാരസ് (34–ാം മിനിറ്റ്), മെസ്സി (54–പെനൽറ്റി), ഡേവിഡ് റൂയിസ് എന്നിവരുടെ ഗോളിൽ തിരിച്ചടിച്ചു.

എന്നാ‍ൽ 44–ാം മിനിറ്റിൽ മൂന്നാം ഗോളും നേടിയ ഹിലാൽ 88–ാം മിനിറ്റിൽ ബ്രസീലിയൻ താരം മാ‍ൽക്കമിന്റെ ഗോളിൽ വിജയമുറപ്പിച്ചു. കഴിഞ്ഞ വർഷം ഫ്രഞ്ച് ക്ലബ് പിഎസ്ജി വിട്ട മെസ്സിയെ വൻതുക വാഗ്ദാനം ചെയ്ത് അൽ ഹിലാൽ ടീമിലേക്കു ക്ഷണിച്ചിരുന്നു. അതു നിരസിച്ചാണ് മെസ്സി അമേരിക്കൻ മേജർ ലീഗ് സോക്കർ ക്ലബ്ബായ ഇന്റർ   മയാമിയിലേക്കു പോയത്.