ഏഷ്യൻ കപ്പ് സെമിഫൈനൽ: ജോർദാൻ ദക്ഷിണ കൊറിയയേയും ഇറാൻ ഖത്തറിനേയും നേരിടും

അൽ ഖോർ (ഖത്തർ) ∙ പെനൽറ്റി ഷൂട്ടൗട്ട് വരെ ആവേശം നീണ്ട പോരാട്ടത്തിൽ ഉസ്ബെക്കിസ്ഥാനെ 3–2നു തോൽപിച്ച്, ആതിഥേയരായ ഖത്തർ ഏഷ്യൻ കപ്പ് ഫുട്ബോൾ സെമിയിൽ കടന്നു. എക്സ്ട്രാ ടൈമിൽ സ്കോർ 1–1 സമനിലയായതോടെയാണ് മത്സരം ഷൂട്ടൗട്ടിലേക്കു നീണ്ടത്. 3 കിക്കുകൾ രക്ഷപ്പെടുത്തിയ ഗോൾകീപ്പർ മെഷാൽ ബർഷാമാണ് ഖത്തറിന്റെ വിജയശിൽപി. ബുധനാഴ്ച രാത്രി 8.30ന് നടക്കുന്ന രണ്ടാം സെമിയിൽ ഇറാൻ ആണ് ഖത്തറിന്റെ എതിരാളികൾ. 

നാലുവട്ടം ചാംപ്യൻന്മാരും ഏഷ്യൻ വൻകരയിലെ ടോപ് റാങ്കുകാരുമായ ജപ്പാനെ കീഴടക്കിയാണ് ഇറാൻ സെമിയിൽ കടന്നത്. ആദ്യ സെമിയിൽ നാളെ രാത്രി 8.30ന് ജോർദാൻ ദക്ഷിണ കൊറിയയെ നേരിടും. ഇന്നു മത്സരമില്ല.