ഐ ലീഗിലും വനിതാ ലീഗിലും ഗോകുലത്തിന് വിജയം

കോഴിക്കോട് ∙ തുല്യശക്തികളുടെ തീപാറുന്ന പോരാട്ടത്തിനൊടുവിൽ ഇന്ത്യൻ വനിതാ ലീഗ് ഫുട്ബോളിൽ ഗോകുലം വനിതകൾക്കു വിജയം. ഒന്നാം സ്ഥാനത്തുണ്ടായിരുന്ന ഒഡീഷ എഫ്സിയെ 2–1നു തോൽപിച്ച ഗോകുലം ഒന്നാം സ്ഥാനത്തെത്തി. ഫാസില ഇക്വാപുത്താണ് ഗോകുലത്തിന്റെ 2 ഗോളുകളും നേടിയത്. ഇതോടെ 9 കളിയിൽ 20 പോയിന്റുമായി ഗോകുലം ഒന്നാമതെത്തി. ലീഗിൽ ഇതുവരെ 21 ഗോളുകളാണ് ഗോകുലം നേടിയത്. 8 കളികളിൽ 19 പോയിന്റുമായി ഒഡീഷ രണ്ടാം സ്ഥാനത്തുണ്ട്. 16 ഗോളുകളാണ് ഒഡീഷയുടെ ഇതുവരെയുള്ള നേട്ടം.

ഐ ലീഗിന്റെ രണ്ടാംപാദത്തിൽ ഗോകുലം എഫ്സിയുടെ തിരിച്ചുവരവ്. ഇന്റർകാശി എഫ്സിയെ 4–2നു ഗോകുലം തോൽപിച്ചു. ഗോകുലത്തിനായി ആദ്യമായി കളത്തിലിറങ്ങിയ സെർബിയൻതാരം നിക്കോള സ്റ്റൊഹാനോവിച്ച് 2 ഗോളുകൾ നേടി. ക്യാപ്റ്റൻ അലക്സ് സാഞ്ചസ്, കെ. അഭിജിത്ത് എന്നിവരും ലക്ഷ്യം കണ്ടു. ഇൻജറി ടൈമിൽ ഗോകുലം പരിശീലകൻ ഡോമിംഗോ ഓരാമസ് ചുവപ്പുകാർഡു കിട്ടി പുറത്തായി. 87–ാം മിനിറ്റിൽ ഇന്റർകാശി പരിശീലകൻ സാന്റാമരീനയ്ക്കു മ‍ഞ്ഞക്കാർഡും കിട്ടിയിരുന്നു.