സൗന്ദര്യ പ്രശ്നങ്ങൾ പലത്, പരിഹാരം ഒന്ന്– കറ്റാർവാഴ
Mail This Article
സൗന്ദര്യ സംരക്ഷണത്തിൽ ഏറ്റവുമധികം ഉപയോഗിക്കപ്പെടുന്ന പ്രകൃതദത്ത വസ്തുക്കളിൽ ഒന്നാണ് കറ്റാർ വാഴ. എണ്ണിയാലൊടുങ്ങാത്തതാണ് കറ്റാർ വാഴയുടെ ഗുണങ്ങൾ. ചർമ സംരക്ഷണത്തിനും സൗന്ദര്യ വര്ധനത്തിനും ഉപയോഗിക്കുന്ന നിരവധി വസ്തുക്കളിൽ കറ്റാർ വാഴ ഉപയോഗിക്കുന്നുണ്ട്. വിവിധ സൗന്ദര്യ പ്രശ്ങ്ങൾക്കും പരിഹാരം കാണാൻ കറ്റാർ വാഴ എങ്ങനെയാണ് ഉപയോഗിക്കുന്നതെന്നു നോക്കാം.
ചർമ്മത്തിന് തിളക്കം ലഭിക്കാന്
ഒരു ടീ സ്പൂൺ മഞ്ഞൾപ്പൊടി, തേൻ,റോസ് വാട്ടർ, പാൽ എന്നിവയെടുത്തു നന്നായി മിക്സ് ചെയ്യുക. ശേഷം ഈ മിശ്രിതത്തിലേക്ക് അൽപ്പം കറ്റാർ വാഴയുടെ ജെൽ ചേർത്ത് നന്നായി മിക്സ് ചെയ്യുക. അതിനുശേഷം ഈ മിശ്രിതം മുഖത്തു തേച്ചു പിടിപ്പിക്കുക. ഇരുപതു മിനിറ്റിനു ശേഷം കഴുകി കളയാം. ഇങ്ങനെ ചെയ്യുന്നതിലൂടെ മുഖത്തിന് തിളക്കം ലഭിക്കും.
കരുവാളിപ്പ് മാറാൻ
കറ്റാർ വാഴയുടെ നീരിനൊപ്പം ഒരൽപ്പം ചെറു നാരങ്ങാ നീരു കൂടി ചേർത്ത് നന്നായി മിക്സ് ചെയ്യുക. ഈ മിശ്രിതം കരുവാളിപ്പുള്ള ഭാഗങ്ങളിൽ പുരട്ടുക. പത്തു മിനിറ്റിനു ശേഷം ഒരു പഞ്ഞി ഉപയോഗിച്ച് ഈ മിശ്രിതം തുടച്ചു കളയാം. ശേഷം മുഖം തണുത്ത വെള്ളത്തിൽ കഴുകുക. ആഴ്ചയിൽ രണ്ടു തവണ ഇതൊന്നു പരീക്ഷിച്ചു നോക്കൂ, കരുവാളിപ്പ് മാറി മുഖം സുന്ദരമാകുന്നതു കാണാം.
മുഖക്കുരുവിന്റെ പാടുകൾ മാറാൻ
കറ്റാർവാഴയുടെ നീരിനൊപ്പം ഒരൽപ്പം റോസ് വാട്ടർ കൂടി ചേർത്ത് മുഖത്തെ പാടുകളിൽ നന്നായി തേച്ചു പിടിപ്പിക്കുക. കുറച്ചു സമയത്തിനുശേഷം കഴുകിക്കളയാം. സ്ഥിരമായി ചെയ്താൽ മുഖത്തെ പാടുകൾ മാറുകയും മുഖത്തിനു തിളക്കം ലഭിക്കുകയും ചെയ്യും.
എണ്ണമയം അകറ്റാൻ
ചർമത്തിലെ അമിതമായ എണ്ണമയം നിരവധിപ്പേരെ ബുദ്ധിമുട്ടിക്കുന്നുണ്ട്. ഇതു മാറ്റാൻ കറ്റാർവാഴയുടെ നീരിൽ അൽപം തേൻ ചേർത്ത് മുഖത്തു നന്നായി തേച്ചു പിടിപ്പിക്കുക. കുറച്ചു സമയത്തിനു ശേഷം ശുദ്ധമായ തണുത്ത വെള്ളത്തിൽ മുഖം കഴുകുക. ഇങ്ങനെ ചെയ്യുന്നതിലൂടെ എണ്ണമയം നിയന്ത്രിക്കാം.
English Summary : Aloe vera for skin care