രണ്ടാം പിണറായി മന്ത്രിസഭയിൽ പൊതുമരാമത്ത് ടൂറിസം വകുപ്പ് മന്ത്രി. ഡിവൈഎഫ്ഐ ദേശീയ അധ്യക്ഷൻ.സിപിഎം സംസ്ഥാന സമിതി അംഗം. 2021 ലെ തിരഞ്ഞെടുപ്പിൽ ബേപ്പൂരിൽനിന്ന് 28,747 വോട്ടിന്റെ ഭൂരിപക്ഷത്തിൽ നിയമസഭയിലെത്തി.
ഐപിഎസ് ഉദ്യോഗസ്ഥനായിരുന്ന പി. എം. അബ്ദുൽ ഖാദറിന്റെയും കെ.എം. ആയിഷാബിയുടെയും മകനായി 1975 മേയ് 18ന് ബേപ്പൂരിൽ ജനനം. സെന്റ് ജോസഫ് ബോയ്സ് ഹൈസ്കൂൾ, ഫാറൂഖ് കോളജ്, കോഴിക്കോട് ലോ കോളജ് എന്നിവിടങ്ങളിൽ വിദ്യാഭ്യാസം. നിയമബിരുദധാരി. സ്കൂൾ കാലത്ത് എസ്എഫ്ഐയിലൂടെ പൊതുപ്രവർത്തനത്തിലെത്തി. 1998ൽ കാലിക്കറ്റ് യൂണിവേഴ്സിറ്റി യൂണിയൻ ഭാരവാഹിയായി. ഡിവൈഎഫ്ഐ കോഴിക്കോട് ജില്ലാ പ്രസിഡന്റ്, സെക്രട്ടറി, കോഴിക്കോട് സിറ്റി മോട്ടർ ആൻഡ് എന്ജിനീയറിങ് യൂണിയൻ സെക്രട്ടറി, സിഐടിയു സിറ്റി ഓട്ടോ പ്രസിഡന്റ് എന്നീ നിലകളിൽ പ്രവർത്തിച്ചു. 2014 ലെ ലോക്സഭാ തിരഞ്ഞെടുപ്പില് കോഴിക്കോട് മണ്ഡലത്തില് എം.കെ.രാഘവനെതിരെ പരാജയപ്പെട്ടു. മുഖ്യമന്ത്രി പിണറായി വിജയന്റെ മകളും ഐടി പ്രഫഷനലുമായ വീണാ വിജയൻ ആണ് ഭാര്യ.