പോഖറയിൽ വിനോദ സഞ്ചാരികൾക്ക് എന്തൊക്കെയാണ് കാണാനുള്ളത്?

ഹിമാലയൻ രാജ്യമായ നേപ്പാളിലെ അതിമനോഹരമായ ഒരു നഗരമാണ് പോഖറാ. ആ രാജ്യത്തെ ഏറ്റവും വലിയ രണ്ടാമത്തെ നഗരവും (ജനസംഖ്യകൊണ്ട്) ഇതു തന്നെ

∙തലസ്ഥാനമായ കാഠ്മണ്ഡുവിൽ നിന്ന് 200 കി.മീ പടിഞ്ഞാറ് ഫേവാ തടാകത്തിന്റെ തീരത്താണ് ഈ നഗരം. സ്ഥിതി ചെയ്യുന്നത്. സമുദ്രനിരപ്പിൽ നിന്നും 2713 അടി മുതൽ 5710 അടിവരെ വ്യത്യസ്ത ഉയരങ്ങളിലുളള സ്ഥലങ്ങൾ ഈ പ്രദേശത്തുണ്ട്. 

∙ഹിമാലയത്തിന്റെ മഞ്ഞണിഞ്ഞ കൊടുമുടികൾ നിഴലിക്കുന്ന തടാകങ്ങളും നിബിഡ വനങ്ങളും വിവിധ പക്ഷിമൃഗാദികളാൽ സമ്പന്നമായ ജൈവസമ്പത്തും ഈ പ്രദേശത്തിന്റെ സവിശേഷതയാണ്. ഉയരമേറിയ പല കൊടുമുടികളുടെയും കാഴ്ചകൾക്കും പ്രശസ്തമാണ് ഇവിടം. നേപ്പാളിലെ ഏറ്റവും മനോഹരമായ തടാകമാണ് ഫേവ തടാകം.

∙ലോകത്തെ ഏറ്റവും ഉയരം കൂടിയ പത്തു കൊടുമുടികളിൽ മൂന്നെണ്ണം അടങ്ങുന്ന അന്നപൂർണനിരയിലെ വിവിധ ട്രക്കിങ്ങുകൾക്ക് തുടക്കം കുറിക്കുന്നത് പോഖറായിൽ നിന്നാണ്.

∙പ്രകൃതി ദൃശ്യങ്ങൾക്കപ്പുറം നേപ്പാളിലെ ഏറ്റവും തിരക്കു പിടിച്ച സാഹസിക വിനോദസഞ്ചാരകേന്ദ്രമായി മാറിയിട്ടുണ്ട് ഇപ്പോൾ ഈ പട്ടണം. പാരാഗ്ലൈഡിങ്, സ്കൈഡൈവിങ്, സിപ്‍ലൈനിങ്, ബഞ്ചീജംപിങ്, ചെറുതും വലുതുമായ ട്രക്കിങ്ങുകൾ, പർവ്വതാരോഹണം തുടങ്ങിയവയ്ക്കൊക്കെ പോഖറായിൽ അവസരങ്ങളുണ്ട്. 

∙കാഠ്മണ്ഡുവിൽ നിന്നു ദിവസവും രാവിലെ പോഖറായിലേക്ക് ടൂറിസ്റ്റ് ബസ് സർവീസുണ്ട്. അഞ്ച്–ആറ് മണിക്കൂറെടുക്കുന്ന യാത്രയാണിത്. 25 മിനിറ്റ് പറന്നാൽ പോഖറായിലെത്തുന്ന ചെറുവിമാനങ്ങളും കാഠ്മണ്ഡുവിൽ നിന്ന് ലഭ്യമാണ്. 

∙ഇന്ത്യൻ പൗരന്മാർക്ക് അതിർ‌ത്തി രാജ്യമായ നേപ്പാളിലേക്ക് സഞ്ചരിക്കാൻ വീസ ആവശ്യമില്ല. 

∙ഇന്ത്യൻ പാസ്പോർട്ടോ, ഇലക്ഷൻ കമ്മിഷൻ നൽകുന്ന തിരിച്ചറിയൽ കാർഡോ തിരിച്ചറിയൽ രേഖയായി കയ്യിൽ കരുതണം. പാസ്‍പോർട് സൈസ് ഫോട്ടോകളും കൈവശം കരുതേണ്ടതാണ്.