അവഗണനയും പുച്ഛവും, അന്നത്തെ ആ സംഭവം മറക്കാനാവില്ല; ജ്യോതികൃഷ്ണ

‘‘നല്ലതിനെ സ്വീകരിക്കാനും അല്ലാത്തവയെ ഒഴിവാക്കാനും അറിയാം. വിമര്‍ശനങ്ങളെ പുഞ്ചിരിയോടെ നേരിടും, ജീവിതത്തെ വളരെ സിംപിൾ ആയി കണ്ടാല്‍ അതിലും സിംപിളായിത്തന്നെ മുന്നോട്ടും പോകാം. ജീവിതം ഒന്നേയുള്ളൂ, അത് മാക്സിമം എന്‍ജോയ് ചെയ്ത് കളറാക്കണം’’– മലയാളികളുടെ പ്രിയങ്കരിയായ നടി ജ്യോതികൃഷ്ണയുടെ വാക്കുകളാണ്. അഞ്ചുവർഷത്തെ ഇടവേളയ്ക്കു ശേഷം നല്ല കഥാപാത്രങ്ങളിലൂടെ തിരിച്ചുവരവിനായി കാത്തിരിക്കുകയാണ് താരം. തന്റെ ജീവിതത്തെപ്പറ്റിയും സ്വപ്നങ്ങളെപ്പറ്റിയും യാത്രകളെപ്പറ്റിയുമൊക്കെ ‘മനോരമ ഒാൺലൈനിൽ’ മനസ്സുതുറക്കുകയാണ് ജ്യോതികൃഷ്ണ. ജീവിതം ഹൃദ്യമാകുന്നത് യാത്രകളിലൂടെയാണെന്നു പറയുന്നു ജ്യോതി. ‘‘സിനിമ എന്റെ പാഷനാണെങ്കിൽ യാത്രകളോട് എനിക്കു പ്രണയമാണ്. സിനിമയാണ് എന്നെ യാത്രയുടെ ലോകത്ത് എത്തിച്ചത്. ദിലീപേട്ടനൊപ്പമുള്ള ‘ലൈഫ് ഒാഫ് ജോസൂട്ടി’ എന്ന സിനിമയുടെ ഷൂട്ടിങ്ങിനായി ന്യൂസീലൻഡിൽ പോയിരുന്നു. അതായിരുന്നു എന്റെ ലൈഫിലെ ടേണിങ് പോയിന്റ്. ഷൂട്ട് ന്യൂസീലൻഡിലാണ് എന്നു പറഞ്ഞപ്പോൾ എനിക്ക് വലിയ അതിശയം തോന്നിയില്ല, കാരണം അന്ന് യാത്രയോട് അത്ര കമ്പമില്ലല്ലോ, ആ വൈബ് അറിയില്ലല്ലോ. ഗൂഗിളിൽ തിരഞ്ഞപ്പോൾ തണുപ്പുള്ള രാജ്യമാണെന്നൊക്കെ മനസ്സിലായി, നാട്ടിൽനിന്ന് ഒരു കരിമ്പടമൊക്കെ വാങ്ങി വച്ചു. അവിടെ എത്തിയപ്പോഴല്ലേ കഥ മാറിയത്...