ഉലകം ചുറ്റും വാലിബനായി ഉലകനായകന്‍; കളര്‍ഫുള്‍ ചിത്രങ്ങള്‍ കാണാം

മലയാളികള്‍ക്ക് ഏറെ പ്രിയപ്പെട്ട ക്ലാസിക് നായകനടന്മാരിലൊരാളാണ് കമല്‍ഹാസന്‍. ആറാം വയസ്സിൽ അഭിനയിച്ച ആദ്യ ചിത്രത്തിൽ തന്നെ ഏറ്റവും നല്ല ബാലനടനുള്ള രാഷ്ട്രപതിയുടെ പുരസ്കാരം നേടിയ കമല്‍ഹാസന്‍ എക്കാലത്തും വാര്‍ത്തകളിലെ നിറതാരമായിരുന്നു. കഴിവുറ്റ അഭിനയശേഷിയും രാഷ്ട്രീയവും നിലപാടുകളും വിവാദങ്ങളുമെല്ലാം കമല്‍ഹാസനെ എന്നും വെള്ളിവെളിച്ചത്തില്‍ നിര്‍ത്തി.

ഇപ്പോഴിതാ തന്‍റെ ഇന്‍സ്റ്റഗ്രാം അക്കൗണ്ടില്‍ ഒരുപിടി മികച്ച യാത്രാചിത്രങ്ങള്‍ പങ്കുവച്ചിരിക്കുകയാണ് താരം. ലോകത്തിന്‍റെ വിവിധ ഭാഗങ്ങളിലുള്ള, വിവിധ രാജ്യങ്ങളില്‍ നിന്നും എടുത്തതാണീ ചിത്രങ്ങള്‍.

ഫിക്‌സ്‌ബർഗ്

ആഫ്രിക്കയില്‍ നിന്നുമാണ് ഏറ്റവും പുതിയ ചിത്രം പോസ്റ്റ്‌ ചെയ്തിട്ടുള്ളത്. വെളുത്ത ടീഷര്‍ട്ടും പാന്‍റ്സുമണിഞ്ഞ്‌, കയ്യില്‍ ക്യാമറയുമായി നടന്നുവരുന്ന കമല്‍ഹാസനെ ഈ ഫോട്ടോയില്‍ കാണാം. ഫിക്‌സ്‌ബർഗ് പാലമാണ് ഈ ചിത്രത്തില്‍ ലൊക്കേഷന്‍ ആയി കൊടുത്തിട്ടുള്ളത്. ദക്ഷിണാഫ്രിക്കയിലെ ഫിക്‌സ്‌ബർഗിനും ലെസോത്തോയിലെ മപുത്‌സോയ്‌ക്കും ഇടയിൽ കാലിഡൺ നദിക്ക് കുറുകെയുള്ള ഒരു റോഡ്, റെയിൽ പാലമാണ് ഫിക്‌സ്‌ബർഗ് പാലം. ലെസോത്തോയിൽ നിന്ന് ദക്ഷിണാഫ്രിക്കയിലേക്കും അതിനപ്പുറത്തേക്കും സാധനങ്ങൾ കയറ്റുമതി ചെയ്യുന്നതിനുള്ള ഒരു പ്രധാന റൂട്ടാണിത്. ഇരു രാജ്യങ്ങൾക്കുമിടയിൽ യാത്ര ചെയ്യുന്നവിനോദസഞ്ചാരികളുടെ ഒരു പ്രധാന ക്രോസിംഗ് പോയിന്റ് കൂടിയാണ് ഈ പാലം.

അമാൽഫി

മുന്‍പേ ഇറ്റലിയില്‍ നിന്നുള്ള ചിത്രവും പോസ്റ്റ്‌ ചെയ്തിട്ടുണ്ട്. തെക്കൻ ഇറ്റലിയിലെ കാമ്പാനിയ മേഖലയിൽ സ്ഥിതി ചെയ്യുന്ന അതിമനോഹരമായ അമാൽഫി തീരമാണ് ഈ ചിത്രത്തിലുള്ളത്. പാറക്കെട്ടുകൾക്കും വർണ്ണാഭമായ വീടുകൾക്കും പോസിറ്റാനോ, റാവെല്ലോ തുടങ്ങിയ മനോഹരമായ ഗ്രാമങ്ങൾക്കും പേരുകേട്ടതാണ് അമാൽഫി തീരം. 11 ാം നൂറ്റാണ്ടിലെ സെന്റ് ആൻഡ്രൂ കത്തീഡ്രൽ, പതിമൂന്നാം നൂറ്റാണ്ടിലെ വില്ല റുഫോളോ എന്നിവയുൾപ്പെടെ ചരിത്രപരമായ ഒട്ടേറെ ഇടങ്ങളും ഇവിടെയുണ്ട്.

ലെനാസിയ സൗത്ത്

മറ്റൊരു ചിത്രത്തില്‍ വിമാനത്തിന്‍റെ കോക്ക്പിറ്റില്‍ പൈലറ്റിനൊപ്പം ഇരിക്കുന്ന കമല്‍ഹാസനെയും കാണാം. ദക്ഷിണാഫ്രിക്കയിലെ ജോഹന്നാസ്ബർഗ് നഗരത്തിൽ സ്ഥിതിചെയ്യുന്ന ലെനാസിയ സൗത്ത് ആണ് ഈ സ്ഥലം. ജോഹന്നാസ്ബർഗ് സിറ്റി സെന്ററിൽ നിന്ന് ഏകദേശം 35 കിലോമീറ്റർ തെക്കുപടിഞ്ഞാറായി സ്ഥിതി ചെയ്യുന്ന സ്ഥലമാണിത്. ദാദാചെങ് തിയേറ്റർ-തായ്പേയിലുള്ള ദാദാചെങ് തിയേറ്ററില്‍ നിന്നുള്ള മറ്റൊരു ചിത്രവുമുണ്ട്.

തായ്‌വാനിലെ തായ്‌പേയിയിലെ സിമെൻഡിംഗ് ഏരിയയിൽ സ്ഥിതി ചെയ്യുന്ന ഒരു ചരിത്രപരമായ ഒരു വേദിയാണ് സിമെൻഡിംഗ് റെഡ് ഹൗസ് തിയേറ്റർ എന്നും അറിയപ്പെടുന്ന ദാദാചെങ് തിയേറ്റർ. ജാപ്പനീസ് കൊളോണിയൽ കാലഘട്ടത്തിൽ, 1908 ൽ നിർമ്മിച്ച ഈ തിയേറ്റർ യഥാർത്ഥത്തിൽ പണ്ടുകാലത്ത് പൊതു വിപണിയായാണ് ഉപയോഗിച്ചിരുന്നത്. 1940 കളിൽ, ഇത് ഒരു തിയേറ്ററായി രൂപാന്തരപ്പെടുകയും ചൈനീസ് ഓപ്പറ, പാവ ഷോകൾ, മറ്റ് പരമ്പരാഗത പ്രകടനങ്ങൾ എന്നിവയ്ക്കുള്ള ഒരു ജനപ്രിയ വേദിയായി മാറുകയും ചെയ്തു.

പരമ്പരാഗത തായ്‌വാനീസ് ഓപ്പറ, സംഗീത കച്ചേരികൾ, നൃത്ത പ്രകടനങ്ങൾ എന്നിവയുൾപ്പെടെ വിവിധ സാംസ്കാരിക പരിപാടികളും പ്രകടനങ്ങളും ഇവിടെ അരങ്ങേറുന്നു. ഇവയ്ക്ക് പുറമേ, പാവകളി, കാലിഗ്രാഫി, ചൈനീസ് ഓപ്പറ തുടങ്ങിയ പരമ്പരാഗത കലകളിൽ വർക്ക്ഷോപ്പുകളും ക്ലാസുകളുമെല്ലാം ദാദാചെങ് തിയേറ്ററില്‍ നടക്കാറുണ്ട്. 

English Summary: Kamal Haasan shares Travel Pictures