പാപമുക്തിയും ഐശ്വര്യവും; പ്രദോഷസന്ധ്യയിലെ ശിവഭജനം നല്‍കും നേട്ടങ്ങള്‍

ഇന്ന് ഇടവമാസത്തിലെ കറുത്തപക്ഷ പ്രദോഷദിനം. സന്ധ്യയ്ക്ക് ത്രയോദശി തിഥി വരുന്ന പുണ്യദിനം. മഹാദേവന് പ്രധാനമായ പ്രദോഷ സന്ധ്യയിൽ ശിവക്ഷേത്ര ദർശനം നടത്തി കഴിയാവുന്നത്ര തവണ പഞ്ചാക്ഷരീമന്ത്രം ജപിക്കാം. ഈ സമയത്തെ ഭഗവൽ ഭജനത്തിലൂടെ ഭക്തന്റെ ജീവിത ദുരിതങ്ങൾക്ക് ആശ്വാസം ലഭിക്കും എന്നാണ് വിശ്വാസം.

Read also :ഈ കൂറുകാർക്ക് അഭിമാനനേട്ടം, ധനലാഭം; ഇടവമാസഫലം ഒറ്റനോട്ടത്തിൽ

ഭഗവാൻ ഏറ്റവും പ്രസന്നനായിരിക്കുന്ന പ്രദോഷസന്ധ്യയിൽ  പാർവതീ ദേവിയുടെ മുന്‍പില്‍ ആനന്ദ നടനം ആടും. ഈ പുണ്യവേളയില്‍ സരസ്വതീ ദേവി  വീണ വായിക്കുകയും  ബ്രഹ്മാവ് താളം പിടിക്കുകയും ലക്ഷ്മീദേവി  ഗീതം ആലപിക്കുകയും മഹാവിഷ്ണു മൃദംഗം വായിക്കുകയും ചെയ്യുന്നു . നന്ദിയും ഭൃംഗിയും ഗന്ധര്‍വയക്ഷ കിന്നരന്മാരും  തുടങ്ങീ  എല്ലാവരും ഭഗവാനെ ഭക്തിയോടെ സേവിച്ചു നിൽക്കും. ഈ അവസരത്തിൽ നാം ജപിക്കുന്ന ഓരോ മന്ത്രത്തിനും ഇരട്ടിഫലമാണ് . ഭക്തിയോടെ ഭഗവാനെ ഭജിച്ചാൽ  സന്താനസൗഭാഗ്യം, ദാരിദ്ര്യദുഃഖശമനം, ആയുരാരോഗ്യം, പാപമുക്തി, ഐശ്വര്യം, സത്കീർത്തി എന്നിവയെല്ലാമാണ് ഫലം.

ശിവസഹസ്രനാമം , പഞ്ചാക്ഷരീ സ്തോത്രം എന്നിവ സന്ധ്യയ്ക്ക് ജപിക്കാം. ക്ഷപ്രകോപിയയായ ഭഗവാനെ ശാന്തസ്വരൂപനാക്കുന്നതിന് ശിവാഷ്ടക ജപം  ഉത്തമമാണ് .  ശിവാഷ്ടകം നിത്യേന ജപിക്കുന്നത് ജീവിതത്തിലെ പ്രതിസന്ധിയെല്ലാം നീങ്ങി  സുഗമമായി മുന്നോട്ടു പോവാൻ സഹായിക്കും എന്നാണ് വിശ്വാസം .

Content Summary : Importance of Pradosham Day in Edavam 1198