സമ്പൂർണ നക്ഷത്രഫലം 2019 – പൂരുരുട്ടാതി: കാണിപ്പയ്യൂർ

പൂരുരുട്ടാതി നക്ഷത്രത്തിൽ ജനിച്ചവർക്ക് 2019 ൽ  നിലവിലുള്ള പ്രസ്ഥാനത്തിൽ പുതിയ ആശയങ്ങൾ  അവലംബിക്കുവാനോ മേലധികാരിയോ സഹപ്രവർത്തകരോ പറയുന്ന കാര്യങ്ങളെല്ലാം  ലക്ഷ്യത്തിലെത്തിക്കാൻ തക്ക പദ്ധതികളാവിഷ്കരിക്കുവാനോ അഹോരാത്രം പ്രവർത്തിക്കും. അതിന്റെ  പൂർണമായിട്ടുള്ള  പ്രവർത്തനക്ഷമത  2020 ലെ ശരിയാവുകയുള്ളൂ.  ഉദ്യോഗത്തിൽ സ്ഥാനക്കയറ്റം ലഭിക്കുമെങ്കിലും ആറു മാസത്തിനു ശേഷമേ  കുടുംബാംഗങ്ങളെ അവിടേക്ക് കൊണ്ടുപോയി താമസിപ്പിക്കുവാനുള്ള സാഹചര്യം ഉണ്ടാവുകയുള്ളു . നഷ്ടപ്പെട്ട ഉദ്യോഗത്തിനു പകരം വിദേശത്തു മറ്റൊരു ഉദ്യോഗത്തിനു അവസരം വന്നുചേരും.  

മറ്റു ചിലർക്ക്  ഓണക്കാലത്തിനോടനുബന്ധമായി അവധിയിൽ ജന്മനാട്ടിൽ വരണമോ എന്ന ഒരു ആശങ്ക ഉണ്ടാകുമെങ്കിലും അതിൽ ജോലി നഷ്ടപ്പെടും എന്ന വേണ്ടപ്പെട്ടവരുടെ നിർദേശം ലഭിക്കുന്നതുവഴി  വരവ് വേണ്ടെന്ന് വച്ച് നവംബറിനു ശേഷം ജന്മനാട്ടിൽ വന്നുപോകുവാനുള്ള സാഹചര്യങ്ങളാണ് ഉണ്ടാവുക . ഗൗരവമുള്ള വിഷയങ്ങൾ ലാഘവത്തോടുകൂടി ചെയ്തു തീർക്കും. ഭയഭക്തി ബഹുമാനത്തോടുകൂടി ചെയ്യുന്ന പ്രവർത്തനങ്ങളിൽ അനുകൂലമായ വിജയം കൈവരിക്കും. വ്യാപാര വിപണന വിതരണ മേഖലകളിൽ ധാരാളം പ്രവർത്തിക്കുവാനുള്ള അവസരം ഉണ്ടാവുമെങ്കിലും  സാമ്പത്തിക നേട്ടം കുറയുവാനാണ് യോഗമുള്ളത്. 

സംയുക്ത സംരംഭങ്ങളില്‍ ഏർപ്പെട്ടുകൊണ്ട് കാർഷിക മേഖലകളിൽ   തുടക്കം കുറിക്കുവാനുള്ള അവസരം ഉണ്ടാവാം 
. പുണ്യകർമ്മങ്ങൾക്കും ധർമ്മകർമ്മങ്ങൾക്കും സർവാത്മനാ സഹകരിക്കുന്നതുവഴി മനസ്സിനു വളരെയധികം ആശ്വാസകരമായിട്ടുള്ള അന്തരീക്ഷം സംജാതമാകും. പദ്ധതി സമർപ്പണത്തിൽ ലക്ഷ്യപ്രാപ്തി നേടും. വിദ്യാർഥികള്‍ക്ക് അനുകൂലമായ വിജയം  വന്നുചേരും. ശാസ്ത്രജ്ഞർക്കും ഗവേഷകർക്കും വിജയം കൈവരിക്കുവാൻ ഇടവരുമെങ്കിലും അതിൽ  പ്രതീക്ഷിച്ചതുപോലെയുള്ള നേട്ടം വളരെ കുറവായിരിക്കും.

 സൽകീർത്തി, സജ്ജനപ്രീതി എന്നിവ കുറയുന്ന സാഹചര്യങ്ങളുണ്ടാവാം  പൊതുവേ പൂരുരുട്ടാതി നക്ഷത്രക്കാർക്ക് ഈയൊരു വർഷം വളരെ അനുകൂലമായിട്ടുള്ള സാഹചര്യം  വന്നുചേരുമെങ്കിലും എല്ലാം വേണ്ടവിധത്തില്‍ പൂർത്തീകരിക്കുവാൻ  ഈശ്വരപ്രാർഥനകൾ നടത്തുന്നത് നന്ന് . കുടുംബബന്ധത്തിന് പ്രാധാന്യം നൽകുന്ന മക്കളുടെ സാമീപ്യം മനസ്സമാധാനത്തിന് വഴിയൊരുക്കും. കടം കൊടുത്ത സംഖ്യ തിരിച്ചു ലഭിക്കുന്നതുവഴി ആശ്വാസത്തിനു യോഗം കാണുന്നു. ദീർഘകാല നിക്ഷേപമെന്ന നിലയിൽ സമീപത്തുള്ളതോ അല്ലെങ്കിൽ അനുബന്ധമായിട്ടുള്ള ഭൂമിയോ വാങ്ങുവാനുള്ള സാഹചര്യങ്ങൾ കൂടി പൂരുരുട്ടാതി നക്ഷത്രക്കാർക്ക് 2019 ൽ വന്നുചേരുവാൻ യോഗം കാണുന്നുണ്ട്.