സമ്പൂർണ വിഷുഫലം 2019, ചതയം നക്ഷത്രം : കാണിപ്പയ്യൂർ‌

സഹപ്രവർത്തകരുടെ സഹായസഹകരണത്തിൽ ബൃഹത്പദ്ധതികൾ ഏറ്റെടുത്ത് പൂർത്തീകരിക്കുന്നത് പുതിയ ഉദ്യോഗത്തിന് വഴിയൊരുക്കും. നിലവിലുള്ള വാഹനത്തിനു പുറമെ മറ്റൊരു വാഹനവും വാങ്ങും. സ്വന്തം ചുമതലകൾ അന്യരെ ഏൽപിക്കുന്നതും, പണം കടം കൊടുക്കുന്നതും അബദ്ധമായിത്തീരും. ആത്മവിശ്വാസം, കാര്യനിർവ്വഹണശക്തി, ഉത്സാഹം, ഉന്മേഷം തുടങ്ങിയവ പ്രവർത്തനക്ഷമതയ്ക്കും പ്രായത്തിലുപരി പക്വതയോടുകൂടിയ സമീപനം ആർജ്ജിക്കുന്നതിനാൽ സൽകീർത്തിയും സജ്ജനബഹുമാന്യതയും വന്നുചേരും. വാത–നാഡീ–ഹൃദ്‌രോഗങ്ങൾക്ക് ശസ്ത്രക്രിയ വേണ്ടിവരും.

ജീവിതസാഹചര്യങ്ങളെ മാറ്റിമറിക്കുന്ന പല ഘടകങ്ങളും വന്നുചേരുമെങ്കിലും യുക്തിപൂർവമുള്ള സമീപനത്താൽ അതിജീവിക്കുവാൻ സാധിക്കും. പുതിയ കരാറുജോലിയിൽ ഒപ്പുവെയ്ക്കും. വിവരസാങ്കേതികവിദ്യയിൽ പുതിയ കണ്ടെത്തലുകൾക്കു സാക്ഷിയാകും. ജന്മനാട്ടിലെ ആരാധനാലയത്തിലെ ഉത്സവാഘോഷങ്ങളിൽ പങ്കെടുക്കുവാൻ സാധിക്കും. ആത്മാർഥമായ പ്രവർത്തനങ്ങളാൽ ഉദ്ദേശിച്ച കാര്യങ്ങൾ നിഷ്പ്രയാസം സാധിക്കും.

സംസർഗ്ഗഗുണത്താൽ സദ്ചിന്തകൾ വർധിക്കും. പക്വതയും സംരക്ഷണചുമതലയും ഉള്ള മക്കളുടെ സമീപനത്തിൽ ആശ്വാസം തോന്നും. ആരോഗ്യസംരക്ഷണത്തിൽ കൂടുതൽ ശ്രദ്ധ വേണ്ടിവരും. നിസ്സാരകാര്യങ്ങൾക്കുപോലും കഠിനപ്രയത്നം വേണ്ടിവരും. വിദഗ്ധ ചികിത്സകളാൽ സന്താനഭാഗ്യമുണ്ടാകും. ജീവിതനിലവാരം വർധിച്ചുവരുന്നതിനാൽ പുതിയ ഗൃഹം വാങ്ങുന്നതിനെപ്പറ്റി പുനരാലോചിക്കും.