ഈ ആഴ്ച ഓരോ നക്ഷത്രക്കാർക്കും എങ്ങനെ? സമ്പൂർണ നക്ഷത്രഫലം– കാണിപ്പയ്യൂർ
![Yearly Star Prediction by Kanippayyur Image Credit: ithinksky/ Shutterstock](https://img-mm.manoramaonline.com/content/dam/mm/mo/astrology/star-predictions/images/2023/12/17/weekly-professional-prediction-december-03-to-09.jpg?w=1120&h=583)
Mail This Article
അശ്വതി: അർഹമായ പൂർവികസ്വത്ത് രേഖാപരമായി ലഭിക്കും. മുൻകോപം നിയന്ത്രിക്കണം.
ഭരണി: സങ്കൽപത്തിനനുസരിച്ച് പുത്രന്റെ വളർച്ചയിൽ ആത്മാഭിമാനം തോന്നും. ജീവിതനിലവാരം വർധിച്ചതിനാൽ കൂടുതൽ സൗകര്യമുള്ള ഗൃഹം വാങ്ങുവാൻ ധാരണയാകും.
കാർത്തിക: പ്രത്യുപകാരം ചെയ്യുവാൻ സാധിച്ചതിനാൽ കൃതാർഥനാകും. അധ്വാനഭാരവും ചുമതലകളും വർധിക്കുന്ന വിഭാഗത്തിലേക്ക് ഉദ്യോഗമാറ്റമുണ്ടാകും.
രോഹിണി: ഉപരിപഠനത്തിന്റെ അന്തിമഭാഗമായ പദ്ധതി സമർപ്പണത്തിന് തയാറാകും. പുതിയ കരാർജോലികളിൽ ഒപ്പുവയ്ക്കുവാനിടവരും.
മകയിരം: പ്രവൃത്തിയിലുള്ള ആത്മാർഥത, ലക്ഷ്യബോധം, നിഷ്കർഷ എന്നിവ സർവകാര്യ വിജയത്തിനു വഴിയൊരുക്കും. സ്വപ്നത്തിൽ കാണുവാനിടയായ കാര്യങ്ങൾ സഫലമാകും.
തിരുവാതിര: അവസരോചിതമായി പ്രവർത്തിക്കുവാൻ സാധിക്കും. സമാന ചിന്താഗതിയിലുള്ളവരുമായി സൗഹൃദ ബന്ധത്തിലേർപ്പെടുവാൻ അവസരമുണ്ടാകും.
പുണർതം: നിഗമനങ്ങൾ ശരിയാണെന്നു ബോധ്യമായതിനാൽ സാമ്പത്തിക വിഭാഗത്തിൽ കൂടുതൽ ശ്രദ്ധ കേന്ദ്രീകരിക്കും. കുടുംബജീവിതത്തിൽ സ്വസ്ഥതയും സമാധാനവും ഉണ്ടാകും.
പൂയം: ഉദ്യോഗമുപേക്ഷിച്ചു വ്യാപാരം തുടങ്ങുവാൻ തീരുമാനിക്കും. അസാധ്യമെന്നു തോന്നുന്ന കാര്യങ്ങൾ സുഹൃത്സഹായത്താൽ നിഷ്പ്രയാസം സാധിക്കും.
ആയില്യം: അപൂർണമായ ഗൃഹം വിൽപന ചെയ്തു പട്ടണത്തിൽ ഗൃഹം വാങ്ങുവാൻ തീരുമാനിക്കും. വിനിമയ വ്യത്യാസക്കുറവിനാൽ വിദേശബന്ധമുള്ള വ്യാപാരത്തിൽ നിന്നു തൽക്കാലം ഒഴിഞ്ഞുമാറും.
മകം: ചിന്തകൾക്കതീതമായി പ്രവർത്തിക്കുവാൻ സാധിക്കുന്നതിനാൽ ആശ്ചര്യവും ആത്മാഭിമാനവും തോന്നും. വിജ്ഞാനികളുടെ വചനങ്ങൾ പലപ്പോഴും നിർണായക തീരുമാനങ്ങൾ കൈക്കൊള്ളുവാൻ ഉപകരിക്കും.
പൂരം: സന്മനസുള്ളവരുമായുള്ള സഹവർത്തിത്വത്താൽ സദ്ചിന്തകൾ വർധിക്കും. വിദഗ്ധ ചികിത്സകളാലും ഈശ്വര പ്രാർഥനകളാലും സന്താനഭാഗ്യമുണ്ടാകും.
ഉത്രം: അന്തിമമായി ഉദ്ദേശിച്ച വിഷയത്തിൽ പ്രവേശനം ലഭിക്കും. സുവ്യക്തമായ ആശയവും ലക്ഷ്യവുമുള്ള പ്രവൃത്തികൾ ലാഘവ ബുദ്ധിയോടുകൂടി ചെയ്യുന്നതിനാൽ പുത്രനോട് ആദരവ് തോന്നും.
അത്തം: റോഡ് വികസനത്തിന് ഭൂമി വിട്ടുകൊടുക്കുവാനിടവരും. ഗൃഹത്തിന്റെ അറ്റകുറ്റപ്പണികൾ തുടങ്ങിവയ്ക്കും.
ചിത്തിര: അർപ്പണ മനോഭാവവും ലക്ഷ്യബോധത്തോടു കൂടിയ പ്രവർത്തനവും ഉദ്യോഗം നഷ്ടപ്പെടുവാനുള്ള സാധ്യതകളെ കുറയ്ക്കും. സമ്മാന പദ്ധതികളിൽ വിജയിക്കും.
ചോതി: ബന്ധുക്കൾക്കിടയിലുള്ള തർക്കങ്ങളിൽ നിഷ്പക്ഷ മനോഭാവം സ്വീകരിക്കുകയാണ് നല്ലത്. പഠനകാര്യങ്ങളിൽ ഉത്സാഹവും ഉന്മേഷവും വർധിക്കും.
വിശാഖം: കാര്യനിർവഹണശക്തി വർധിക്കുന്നതിനാൽ കൂടുതൽ ചുമതലകൾ ഏറ്റെടുക്കുവാൻ നിർബന്ധിതനാകും. പണം കൈകാര്യം ചെയ്യുന്നതിൽ ശ്രദ്ധ വേണം.
അനിഴം: നിർദേശവും ഉപദേശവും നൽകുന്ന സ്ഥാപനം തുടങ്ങുവാൻ തീരുമാനിക്കും. പ്രവർത്തനശൈലിയിൽ കാലോചിതമായ മാറ്റങ്ങൾ വരുത്തുവാൻ നിർബന്ധിതനാകും.
തൃക്കേട്ട: അർഥവ്യാപ്തിയോടു കൂടിയ വചനങ്ങൾ തനതായ മൂല്യത്തോടു കൂടി പ്രവർത്തിച്ചാൽ ഉദ്ദേശിക്കുന്ന കാര്യങ്ങൾ സാധിക്കും. വിതരണ സമ്പ്രദായം വിപുലീകരിക്കുവാൻ കർമോത്സുകരായവരെ നിയമിക്കും.
മൂലം: അപരിചിതവും അവ്യക്തവുമായ മേഖലകളിൽ പണം മുടക്കുന്നത് അബദ്ധങ്ങൾക്കു വഴിയൊരുക്കും. വിദ്യാഭ്യാസമുണ്ടെങ്കിലും വിവേചനബുദ്ധിയില്ലാത്ത ബന്ധുവിന്റെ സമീപനത്തിൽ മനോവിഷമം തോന്നും.
പൂരാടം: ഗൃഹനിർമാണം ഏറെക്കുറെ പൂർത്തീകരിച്ച് ഗൃഹപ്രവേശന കർമം നിർവഹിക്കും. സഹയാത്രികനു പണം നഷ്ടപ്പെട്ടതിനാൽ സാമ്പത്തികസഹായം നൽകുവാനിടവരും.
ഉത്രാടം: ഹ്രസ്വകാല സുരക്ഷാ പദ്ധതികളിൽ പണം നിക്ഷേപിക്കും. അസാന്മാർഗികളിൽ നിന്നും പിന്മാറുവാൻ ഉൾപ്രേരണയുണ്ടാകും.
തിരുവോണം: മാനസാന്തരം വന്ന ബന്ധുവിന്റെ വളർച്ചയിൽ മനഃസമാധാനമുണ്ടാകും. മാതാപിതാക്കളുടെ വാക്കുകൾ അനുസരിക്കാത്തവർക്ക് അബദ്ധങ്ങൾ വന്നുചേരും.
അവിട്ടം: ഏറ്റെടുത്ത ദൗത്യം നിറവേറ്റുവാൻ അശ്രാന്ത പരിശ്രമം വേണ്ടിവരും. അപര്യാപ്തതകൾ മനസ്സിലാക്കി ജീവിതം നയിക്കുന്ന ജീവിതപങ്കാളിയോട് ആദരവ് തോന്നും.
ചതയം: വ്യവഹാര വിജയത്താൽ അർഹമായ ഉന്നതാധികാര പദവിയിൽ നിയമനമുണ്ടാകും. നിശ്ചിത വ്യവസ്ഥകളോടു കൂടി ഗൃഹസമുച്ചയം പണിയുവാൻ ഭൂമി വിട്ടുകൊടുക്കും.
പൂരുരുട്ടാതി: വ്യവസായ പുരോഗതി കൈവന്നതിനാൽ ഗുണനിലവാരം വർധിപ്പിക്കുവാൻ നിർദേശം തേടും. ധനവിഭവ സമാഹരണത്തിൽ ലക്ഷ്യപ്രാപ്തി കൈവരിക്കുവാൻ സാധിക്കും.
ഉത്തൃട്ടാതി: കക്ഷിരാഷ്ട്രീയ പ്രവർത്തനങ്ങൾ ഉപേക്ഷിച്ച് വ്യാപാര വ്യവസായ മേഖലകളിൽ വ്യാപൃതനാകും. ധനകാര്യസ്ഥാപനത്തിന്റെ സഹായത്തോടു കൂടി വാഹനം മാറ്റി വാങ്ങുവാൻ തീരുമാനിക്കും.
രേവതി: നേർന്നു കിടപ്പുള്ള വഴിപാടുകൾ നടത്തുവാനിടവരും. നിശ്ചയദാർഢ്യത്തോടു കൂടിയ പ്രവർത്തനങ്ങൾ ലക്ഷ്യപ്രാപ്തി കൈവരിക്കുവാൻ ഉപകരിക്കും.