‘കേദാറിന് പൂർണത്രയീശന്റെ തിരുനടയിൽ ചോറൂണ്’ ചിത്രങ്ങൾ പങ്കുവച്ച് സ്നേഹയും ശ്രീകുമാറും

മലയാളി കുടുംബപ്രേക്ഷകരുടെ ഇഷ്ടതാരങ്ങളായ സ്നേഹയും ശ്രീകുമാറും മകൻ കേദാറിന്റേ ചോറൂണിന്റെ ചിത്രങ്ങൾ  സമൂഹ മാധ്യമങ്ങളിലൂടെ പങ്കുവച്ചിരിക്കുകയാണ്. 2023 ജൂൺ ഒന്നിനാണ് ഇവർക്ക് കുഞ്ഞ് ജനിച്ചത്. കുഞ്ഞിന്റെ വിശേഷങ്ങൾ തന്റെ സുഹൃത്തുക്കൾക്കും ആരാധകർക്കുമായി പങ്കുവെയ്ക്കുന്ന സ്നേഹ മകന്റെ പേരിടൽ ചടങ്ങുകളും പിന്നീട് നടന്ന ഫോട്ടോഷൂട്ട് ചിത്രങ്ങളുമെല്ലാം സമൂഹമാധ്യമങ്ങളിലൂടെ പുറത്തുവിട്ടിരുന്നു. കേദാർ എന്നാണ് കുഞ്ഞിന് പേരിട്ടിരിക്കുന്നതെന്നും അന്ന് സ്നേഹ വെളിപ്പെടുത്തി.

''കേദാറിന്റെ ചോറൂണ് പൂർണത്രയീശന്റെ തിരുനടയിൽ'' എന്നാണ് ചിത്രങ്ങൾക്ക് താഴെ കുറിച്ചിരിക്കുന്നത്. പിതാവ് ശ്രീകുമാറിന്റെ മടിയിലിരുന്നാണ് കേദാർ ആദ്യ അന്നം കഴിക്കുന്നത്. ചിത്രങ്ങളിൽ ഇരുവർക്കും സമീപത്തായി സ്‌നേഹയെയും കാണാം. ബഹളങ്ങളൊന്നുമില്ലാതെ, ശാന്തമായി ചിത്രങ്ങൾക്ക് പോസ് ചെയ്യുന്ന കേദാർ തന്നെയാണ് സ്നേഹ പങ്കുവെച്ച ചിത്രങ്ങളിലെ താരം. 

സുഹൃത്തുക്കളും താരങ്ങളുമടക്കം നിരവധി പേരാണ് ചിത്രങ്ങളുടെ താഴെ കമന്റുകൾ കുറിച്ചിരിക്കുന്നത്. നടി ശരണ്യ മോഹൻ ''മുത്തേ'' എന്ന് വിളിച്ചുകൊണ്ടു ഹൃദയത്തിന്റെ ഇമോജികൾ ചേർത്താണ് കമന്റ് എഴുതിയിരിക്കുന്നത്. അവതാരകയും നടിയുമായ അശ്വതി ശ്രീകാന്ത്, സ്നേഹയുടെയും ശ്രീകുമാറിന്റെയും സുഹൃത്തുക്കൾ,ആരാധകർ എന്നിവരും ആ ചിത്രങ്ങൾക്ക് താഴെ ആ കുടുംബത്തോടുള്ള തങ്ങളുടെ സ്നേഹം അറിയിച്ചിട്ടുണ്ട്.