ഏറെ ഡിമാൻഡുള്ള ആർക്കിടെക്‌റ്റ് ആകാനാണോ ആഗ്രഹം; പഠിക്കാം സർവകലാശാലയ്ക്കു സമാനമായ പദവിയുള്ള സ്ഥാപനത്തിൽ

മനോരമ ലേഖകൻ February 06, 2023 02:02 PM IST

ആർക്കിടെക്‌ചർ മേഖലയിലെ ബിരുദ/ ബിരുദാനന്തര കോഴ്‌സുകൾക്ക് മികച്ച സൗകര്യങ്ങളൊരുക്കിയിട്ടുളള ശ്രേഷ്‌ഠസ്‌ഥാപനമാണ് ഡൽഹിയിലെ സ്കൂൾ ഓഫ് പ്ലാനിങ് ആൻഡ് ആർക്കിടെക്ചർ (എസ്പിഎ). കേന്ദ്രവിദ്യാഭ്യാസമന്ത്രാലയത്തിന്റെ നിയന്ത്രണത്തിലുള്ള ഈ പൊതുമേഖലാ സ്ഥാപനത്തിനു സർവകലാശാലയ്ക്കു സമാനമായ പദവിയുണ്ട്.സ്ഥാപനത്തിലെ 2–വർഷ മാസ്‌റ്റർ പ്രോഗ്രാമുകളിലെ പ്രവേശനത്തിന് ഓൺലൈനായി 28 വരെ അപേക്ഷിക്കാം. അപേക്ഷാഫീ 2500 രൂപ, എൻആർഐ 300 യുഎസ് ഡോളർ.

∙ കോഴ്സുകൾ

എംആർക് (ആർക്കിടെക്‌ചറൽ കൺസർവേഷൻ / അർബൻ ഡിസൈൻ / ലാൻഡ്സ്‌കേപ് ആർക്കിടെക്‌ചർ)

മാസ്റ്റർ ഓഫ് ബിൽഡിങ് എൻജിനീയറിങ് & മാനേജ്‌മെന്റ്

·മാസ്റ്റർ ഓഫ് ഡിസൈൻ (ഇൻഡസ്‌ട്രിയൽ ഡിസൈൻ)

മാസ്റ്റർ ഓഫ് പ്ലാനിങ് (എൻവയൺമെന്റൽ / റീജനൽ/ ട്രാൻസ്‌പോർട്ട് / അർബൻ / ഹൗസിങ്)

∙യോഗ്യത

ആർക്കിടെക്‌ചർ, പ്ലാനിങ്, സിവിൽ / ആർക്കിടെക്‌ചറൽ / എൻവയൺമെന്റൽ / മുനിസിപ്പൽ / ബിൽഡിങ് എൻജിനീയറിങ്, ബിൽഡിങ് സയൻസ്, ഡിസൈൻ, ഫൈൻ ആർട്സ് എന്നീ വിഷയങ്ങളിലെ ബാച‌്‌ലർ ബിരുദം (ഏതെങ്കിലും ശാഖയിലെ ബിടെക്കിനും അവസരമുണ്ട്), ജ്യോഗ്രഫി / സോഷ്യോളജി / ഇക്കണോമിക്‌സ് / സ്റ്റാറ്റിസ്റ്റിക്സ് / ഓപ്പറേഷൻസ് റിസർച് / എൻവയൺമെന്റൽ സയൻസ് / എൻവയൺമെന്റൽ മാനേജ്മെന്റ് എന്നീ വിഷയങ്ങളിലെ മാസ്റ്റർ ബിരുദം, കൺസ്‌ട്രക്‌ഷൻ ടെക്‌നോളജിയിലെ 5-വർഷ ഡിപ്ലോമ എന്നിങ്ങനെ ഏതെങ്കിലും യോഗ്യതയുള്ളവർക്ക് അപേക്ഷിക്കാം.

55% എങ്കിലും മാർക്ക് വേണം. പട്ടിക, പിന്നാക്ക വിഭാഗക്കാർക്ക് 50% മതി. ഓഗസ്റ്റ് 31ന് അകം മാർക് ലിസ്റ്റ് ഹാജരാക്കാവുന്ന ഫൈനൽ ഇയർ വിദ്യാർഥികൾക്കും അപേക്ഷിക്കാം. ഒരാൾ ഒരു പിജി പ്രോഗ്രാമിനേ അപേക്ഷിക്കാവൂ. പ്രവേശനയോഗ്യതയുടെ വിശദാംശങ്ങൾക്ക് വെബ്സൈറ്റിൽ. GATE/CEED/UGC–NET സ്കോറിനും പരിഗണനയുണ്ട്. മാർച്ച് 27–31 ദിവസങ്ങളിലെ ഇന്റർവ്യൂവിനു നേരിട്ട് ഡൽഹിയിലെത്തണം. കേന്ദ്രമാനദണ്ഡപ്രകാരം സംവരണമുണ്ട്. ഓഗസ്റ്റ് 7നു ക്ലാസുകൾ തുടങ്ങും. പരിമിതമായ ഹോസ്റ്റൽ സൗകര്യമുണ്ട്.

∙മറ്റു പ്രോഗ്രാമുകൾ

ആർക്കിടെക്ചർ/പ്ലാനിങ് ബാച്‌ലർ ബിരുദ സിലക്‌ഷൻ ജെഇഇ മെയിൻ വഴിയാണ്. എൻആർഐ വിഭാഗക്കാർക്ക് നേരിട്ട് ബാച്‌ലർ ബിരുദപ്രവേശനത്തിന് വഴിയൊരുക്കുന്ന DASA രീതിയുമുണ്ട്. ഫുൾ–ടൈം / പാർട്–ടൈം പിഎച്ച്ഡി പ്രവേശനത്തിന് എപ്പോൾ വേണമെങ്കിലും അപേക്ഷിക്കാം. ആണ്ടിൽ 2 തവണ പ്രവേശനം നടത്തും.

വെബ്: www.spa.ac.in.

Content Summary : Apply for the Postgraduate Programme at the Delhi School of Planning and Architecture

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.