സിലിക്കയില്ല, ചൂടും കുറവ്; അഗ്നിപർവതത്തിൽ നിന്നും ഒഴുകുന്നത് കരിഓയിൽ പോലുള്ള ലാവ!
![doinyo-w ഓൽ ഡോംഗ്യോ ലെംഗായ് (Photo: x/@godwinmbogo)](https://img-mm.manoramaonline.com/content/dam/mm/mo/environment/environment-news/images/2024/4/21/doinyo-w.jpg?w=1120&h=583)
Mail This Article
ഭൂമിയിൽ അനേകം അഗ്നിപർവതങ്ങളുണ്ട്. ഇന്തൊനീഷ്യ, ജപ്പാൻ, ഫിലിപ്പീൻസ് തുടങ്ങിയ രാജ്യങ്ങൾ അഗ്നിപർവത വിസ്ഫോടനങ്ങൾക്ക് പേരുകേട്ടവയുമാണ്. ലോകത്തെ മിക്ക അഗ്നിപർവതങ്ങളിലും വിസ്ഫോടനത്തിനു ശേഷം തിളച്ചുമറിയുന്ന തീക്കുഴമ്പ് പോലെ ലാവാ പ്രവാഹമുണ്ടാകും. എന്നാൽ ഭൂമിയിലുള്ള ഒരേയൊരു അഗ്നിപർവതം ഇക്കാര്യത്തിൽ വ്യത്യസ്തമാണ്. ഈ അഗ്നിപർവതത്തിൽ നിന്നു വിസ്ഫോടനത്തിനു ശേഷം ഉടലെടുക്കുന്നതും ഒഴുകുന്നതും കറുത്ത നിറത്തിൽ വാഹനങ്ങളിൽ നിന്നുള്ള കരിഓയിലിനെ അനുസ്മരിപ്പിക്കുന്ന ദ്രാവകമാണ്.
ആഫ്രിക്കൻ രാജ്യമായ താൻസാനിയയിലെ കിഴക്കൻ ആഫ്രിക്കൻ റിഫ്റ്റ് ഭൗമഘടനയിലുള്ള ഓൽ ഡോംഗ്യോ ലെംഗായ് എന്ന അഗ്നിപർവതമാണ് ഈ വ്യത്യസ്തൻ. കാർബൺ അധിഷ്ഠിത ലാവ അഥവാ നാട്രോകാർബണൈറ്റ് ലാവ പുറപ്പെടുവിക്കുന്ന ഭൂമിയിലെ ഒരേയൊരു അഗ്നിപർവതമാണ് ലെംഗായി. സൗരയൂഥത്തിലെ വീനസിൽ ഇത്തരം ലാവ പുറപ്പെടുവിക്കുന്ന അഗ്നിപർവതങ്ങളുണ്ടെന്നു ശാസ്ത്രജ്ഞർ സംശയിക്കുന്നുണ്ട്.
![ol ഓൽ ഡോംഗ്യോ ലെംഗായ് (Photo: X/ @zoomafrika1)](https://img-mm.manoramaonline.com/content/dam/mm/mo/config-assets/mo-default.jpg)
സാധാരണഗതിയിൽ അഗ്നിപർവതങ്ങൾ സിലിക്കേറ്റ് ധാതുക്കൾ അടങ്ങിയ ലാവയാണ് പുറന്തള്ളുന്നത്. 900 ഡിഗ്രി സെൽഷ്യസിനു മുകളിൽ ഉരുകൽ താപനിലയുള്ളവയാണ് ഈ ധാതുക്കൾ. അതിനാൽ തന്നെ ഈ അഗ്നിപർവതങ്ങളിൽ നിന്നുള്ള ലാവാപ്രവാഹത്തിനു തിളപ്പ് വളരെ കൂടുതലാകും. എന്നാൽ നാട്രോകാർബണൈറ്റ് ലാവ 900 ഡിഗ്രി സെൽഷ്യസ് താപനിലയിൽ തന്നെ ദ്രാവകരൂപമാകും. അതിനാൽ തന്നെ താരതമ്യേന ചൂട് കുറഞ്ഞതാണ് ലെംഗായി അഗ്നിപർവതത്തിൽ നിന്നുള്ള ലാവ.
സിലിക്ക ഇല്ലാത്തതിനാൽ കട്ടികൂടിയതാണ് ഈ അഗ്നിപർവതത്തിൽ നിന്നുള്ള ദ്രാവകം. തീവ്രമായ പൊട്ടിത്തെറികളാണ് ഇവിടെ നടക്കുന്നതെന്ന് ശാസ്ത്രജ്ഞർ പറയുന്നു. കാർബൺ ഡയോക്സൈഡിന്റെ അളവ് ലാവയിൽ കൂടുതലാണെന്നത് ഒരു കാരണമാണ്.
![ol-doinyo ഓൽ ഡോംഗ്യോ ലെംഗായ് (Photo: X/ @DannyMsiriz)](https://img-mm.manoramaonline.com/content/dam/mm/mo/config-assets/mo-default.jpg)
2962 മീറ്റർ പൊക്കമുള്ള ഈ അഗ്നിപർവതത്തിന് രണ്ട് അഗ്നിമുഖങ്ങളുണ്ട്. എന്നാൽ വടക്കുദിശയിൽ സ്ഥിതി ചെയ്യുന്ന അഗ്നിമുഖത്തിൽ നിന്നു മാത്രമാണ് ലാവാപ്രവാഹം സംഭവിക്കുക. 2017 മുതൽ ഈ അഗ്നിപർവതം സജീവമാണ്. ശാസ്ത്രജ്ഞർ ഈ അഗ്നിപർവതത്തെപ്പറ്റി ഗഹനമായി പഠനങ്ങൾ നടത്തിയിട്ടുണ്ട്. ഭൂമിയുടെ രണ്ടാംപാളിയായ മാന്റിലിൽ ധാതുക്കൾ ഉരുകുന്നതാണ് ഈ സവിശേഷ ലാവയ്ക്ക് കാരണമായതെന്നാണ് ശാസ്ത്രജ്ഞർ പറയുന്നത്.