മദീനയിലെ അമീർ മുഹമ്മദ് ബിൻ അബ്ദുൽ അസീസ് മധ്യപൂർവദേശത്തെ ഏറ്റവും മികച്ച പ്രാദേശിക വിമാനത്താവളം
Mail This Article
മദീന ∙ മൂന്നാം തവണയും മദീനയിലെ അമീർ മുഹമ്മദ് ബിൻ അബ്ദുൽ അസീസ് രാജ്യാന്തര വിമാനത്താവളം മധ്യപൂർവദേശത്തെ ഏറ്റവും മികച്ച പ്രാദേശിക വിമാനത്താവളമായി വീണ്ടും തിരഞ്ഞെടുക്കപ്പെട്ടു. 2020, 2021 വർഷങ്ങളിലും ഒന്നാം സ്ഥാനം ലഭിച്ചിട്ടുണ്ട്. ലോകത്തിലെ മികച്ച നൂറ് വിമാനത്താവളങ്ങളുടെ പട്ടികയിൽ മദീന വിമാനത്താവള 50–ാം സ്ഥാനത്താണ്. വിമാനത്താവള മേഖലയിലെ ഏറ്റവും പ്രധാനപ്പെട്ട അവാർഡുകളിലൊന്നായാണ് ഈ അവാർഡിനെ കണക്കാക്കപ്പെടുന്നത്. വിമാനത്താവളങ്ങളിലെ ഉപഭോക്തൃ സംതൃപ്തി സർവേ പ്രകാരം നടന്ന വോട്ടിലൂടെയാണ് അവാർഡ് നൽകുന്നത്.
മദീന വിമാനത്താവളത്തിന് സ്കൈട്രാക്സ് വേൾഡ് എയർപോർട്ട് അവാർഡ് ലഭിച്ചതിലും ഉപഭോക്താക്കൾ മിഡിലീസ്റ്റിലെ ഏറ്റവും മികച്ച പ്രാദേശിക വിമാനത്താവളമായി വോട്ട് ചെയ്തതിലും അഭിമാനമുണ്ടെന്ന് മദീന വിമാനത്താവള ഓപറേറ്റിങ് കമ്പനി സിഇഒ എൻജിനീയർ സുഫ്യാൻ അബ്ദുൽ സലാം പറഞ്ഞു. മികച്ച രാജ്യാന്തര വിമാനത്താവളങ്ങളിൽ ഇടംനേടിയ മദീന വിമാനത്താവളത്തിന് നിരവധി ദേശീയ, പ്രാദേശിക അവാർഡുകളും അംഗീകാരങ്ങളും ലഭിച്ചിട്ടുണ്ട്.