ചൂടോടെ കഴിക്കാം റാഗി ദോശ; ആരോഗ്യത്തിന് അത്യുത്തമം; രാജ്യാന്തര ഫുഡ് ടെക്നോളജിസ്റ്റിന്റെ പാചകക്കുറിപ്പ്

പാചകക്കുറിപ്പു തയാറാക്കിയത് ദേശീയ രാജ്യാന്തര ഭക്ഷ്യ ബ്രാൻഡുകൾക്കു വേണ്ടി പ്രവർത്തിക്കുന്ന ഫുഡ് ടെക്നോളജിസ്റ്റും ഡയറ്റീഷ്യനുമായ ദുർഗ ചെല്ലാറാം, ബെംഗളൂരു. 

ആവശ്യമായ ചേരുവകൾ

1. റാഗിപ്പൊടി - ഒരു കപ്പ്
   അരിപ്പൊടി - കാൽ കപ്പ്
   പച്ചമുളക് അരിഞ്ഞത് - രണ്ടു ചെറിയ സ്പൂൺ
   പുളിയുള്ള കട്ടത്തൈര് - ഒരു കപ്പിന്റെ മൂന്നിൽ ഒന്ന്
   വെള്ളം - ഒന്നരക്കപ്പ്
   ഉപ്പ് - പാകത്തിന്
2. സവാള -    ചെറുത് ഒരെണ്ണം, പൊടിയായി അരിഞ്ഞത്
   മല്ലിയില പൊടിയായി അരിഞ്ഞത് - ഒരു വലിയ സ്പൂൺ
3. എണ്ണ - ഒരു ചെറിയ സ്പൂൺ
4. കടുക് - ഒരു ചെറിയ സ്പൂൺ
   
5. ജീരകം - ഒരു ചെറിയ സ്പൂൺ
   കറിവേപ്പില – 5 ഇതൾ
6. എണ്ണ - ഒരു ചെറിയ സ്പൂൺ

പാകം ചെയ്യുന്ന വിധം

• ഒന്നാമത്തെ ചേരുവ മിക്സിയിലാക്കി നന്നായി അടിച്ചു യോജിപ്പിക്കുക.
• ഇതൊരു ബൗളിലാക്കി 30-45 മിനിറ്റ് അനക്കാതെ വയ്ക്കുക. സവാള പൊടിയായി അരിഞ്ഞതും മല്ലിയിലയും ചേർക്കണം.
• ചീനച്ചട്ടിയിൽ ഒരു ചെറിയ സ്പൂൺ എണ്ണ ചൂടാക്കി കടുകു പൊട്ടിച്ച ശേഷം ജീരകവും കറിവേപ്പില പൊടിയായി അരിഞ്ഞതും ചേർത്തു താളിക്കുക.
• ഇതു റാഗി മിശ്രിതത്തിൽ ചേർത്തു നന്നായി യോജിപ്പിച്ചു ദോശമാവു തയാറാക്കണം. റവ ദോശയ്ക്കെന്നപോലെ മാവു നല്ല അയവിൽ കലക്കണം.
• തവ ചൂടാക്കി ഒരു തവി മാവൊഴിച്ചു ചുറ്റിച്ചു കനം കുറച്ചു പരത്തുക.
• അയഞ്ഞ മാവായതിനാൽ പരത്താനായി തവി ഉപയോഗിക്കേണ്ടതില്ല. 
• ഒരു ചെറിയ സ്പൂൺ എണ്ണ ദോശയിൽ ഒഴിച്ചു കരുകരുപ്പാക്കി മറിച്ചിട്ടു ചുട്ടെടുക്കുക.
• ചൂടോടെ ചട്നിപ്പൊടിയിൽ നെയ്യ് ചേർത്ത്/തേങ്ങാ ചമ്മന്തിക്കൊപ്പം വിളമ്പാം.