ഗ്ലാമർ താരം മെർലിൻ മൺറോയുടെ ചിത്രം, വിറ്റു പോയത് 1620 കോടി രൂപയ്ക്ക്..!

ഏറ്റവും വിലപിടിപ്പുള്ള കലാസൃഷ്ടികളിലൊന്ന് എന്ന റെക്കോർഡ് സ്വന്തമാക്കിയ ചിത്രമാണ് ആൻഡി വാർഹോളിന്റെ 'ഷോട്ട് സേജ് ബ്ലൂ മെർലിൻ'. 2022 ൽ ലേലത്തിൽ വിറ്റു പോയ ചിത്രം ആൻഡി വാർഹോള്‍ എന്ന കലാകാരന്റെ 5 മെർലിൻ മൺറോ ഛായാചിത്രങ്ങളിലൊന്നാണ്. ആ 5 ചിത്രങ്ങൾക്കും കൂടി 2460 കോടി രൂപ വില മതിക്കുമെങ്കിലും 'ഷോട്ട് സേജ് ബ്ലൂ മെർലിൻ' എന്ന ഒറ്റച്ചിത്രത്തിനു മാത്രം വില 1620 കോടി രൂപയാണ്.

വെള്ളിത്തിരയിലെ ഇതിഹാസമായിരുന്ന മെർലിൻ മൺറോയെ അവരുടെ മരണശേഷം തന്റെ ചിത്രങ്ങളിൽ അനശ്വരമാക്കി നിലനിർത്താൻ ആഗ്രഹിച്ച വാർഹോള്‍ 1964 ൽ സിൽക്ക്സ്ക്രീൻ പെയിന്റിങ്ങുകളുടെ ഒരു പരമ്പര വരച്ചു. 40 ഇഞ്ച് ചതുരാകൃതിയിലുള്ള മെർലിൻ മൺറോയുടെ 5 ഛായാചിത്രങ്ങളായിരുന്നു അത്. 1953-ലെ നയാഗ്ര എന്ന ചിത്രത്തിന് വേണ്ടിയുള്ള ഒരു പബ്ലിസിറ്റി ഫോട്ടോയെ അടിസ്ഥാനമാക്കിയാണ് വാർഹോൾ മൺറോയുടെ ഛായാചിത്രങ്ങൾ സൃഷ്ടിച്ചത്. ചുവപ്പ്, ഓറഞ്ച്, ഇളം നീല, ആകാശ നീല, ടർക്കോയ്സ് എന്നിങ്ങനെ വ്യത്യസ്ത നിറങ്ങളിലുള്ള ചിത്രങ്ങൾ, വാർഹോൾ  മാൻഹട്ടനിലെ ഈസ്റ്റ് 47-ാം സ്ട്രീറ്റിലുള്ള തന്റെ സ്റ്റുഡിയോയായ ദ് ഫാക്ടറിയിൽ സൂക്ഷിച്ചു.

അവയിൽ ബ്ലൂ ഷോട്ട് മെർലിൻ 1967-ൽ പീറ്റർ ബ്രാന്റ് 5,000 ഡോളറിനു വാങ്ങി. ഷോട്ട് റെഡ് മെർലിൻ 1989-ൽ ക്രിസ്റ്റീസ് എന്ന ലേലകമ്പനിയിൽ 41 ലക്ഷം ഡോളറിന് മസാവോ വാനിബുച്ചി വാങ്ങിയതോടെയാണ് ഷോട്ട് മെർലിൻസിന്റെ മൂല്യം വർധിക്കുന്നത്. കലാവിപണിയിലെ മാന്ദ്യത്തിനിടയിലും 1998-ൽ ഓറഞ്ച് മെർലിൻ സി ന്യൂഹൗസ് 17.3 ദശലക്ഷം ഡോളറിന് വാങ്ങി. അദ്ദേഹത്തിന്റെ മരണശേഷം കെന്നത്ത് സി. ഗ്രിഫിൻ 2017-ൽ ഏകദേശം 200 ദശലക്ഷം ഡോളറിനാണ് ആ ചിത്രം കരസ്ഥമാക്കിയത്.

ടർക്കോയിസ് മെർലിൻ 2007-ൽ 80 ദശലക്ഷം ഡോളറിന് സ്റ്റീവ് കോഹൻ വാങ്ങിയപ്പോൾ എല്ലാ പ്രതീക്ഷകളെയും കടത്തി വെട്ടി ഷോട്ട് സേജ് ബ്ലൂ മെർലിൻ 2022 മേയ് 9 ന് 195 ദശലക്ഷം ഡോളറിന് വിറ്റു പോയി. അതായത് 1620 കോടി 34 ലക്ഷം രൂപയ്ക്ക്.! 2015 മേയ് മാസത്തിൽ 179.4 ദശലക്ഷം ഡോളറിന് വിറ്റ പിക്കാസോയുടെ 'ലെസ് ഫെമ്മെസ് ഡി അൾജർ' എന്ന ചിത്രത്തിന്റെ റെക്കോർഡ് തകർത്ത വിൽപനയായിരുന്നു അത്.