പട്ടം പോലെ

കുശലയുടെ ഓർമ്മക്കുറിപ്പുകളിലെ വീക്ഷണങ്ങളുടെ പുതുമയും ഭാഷയുടെ അഭൂതപൂർവമായ ചാരുതയും എന്നെ ഏറെ അമ്പരപ്പിക്കുക മാത്രമല്ല ഏറെ ആനന്ദിപ്പിക്കുകയും ചെയ്തു. അവർ ഇന്ന് ഇന്ത്യയിലെ എന്നല്ല, ലോകത്തുതന്നെയും ഏറെ ആദരിക്കപ്പെടുന്ന ഒരു ഭൗമശാസ്ത്രജ്ഞയാണ്. ഭൗമശാസ്ത്രമാണ് അവരുടെ ഇഷ്ടവിഷയമെങ്കിലും ഈ ബഹുമുഖപ്രതിഭയുടെ താൽപര്യം അതിൽ മാത്രം ഒതുങ്ങിനിൽക്കുന്നില്ല. അത് ഉയർന്നു പറക്കുന്ന ഒരു പട്ടംപോലെ എതിർവാതങ്ങളെ അതിജീവിച്ച് ദൂരസ്ഥങ്ങളായ മണ്ഡലങ്ങളിലെത്തി അവിടങ്ങളിലും ആധിപത്യമുറപ്പിക്കുന്നു. കുശല ഇപ്പോഴും കർമ്മനിരതയാണ്. അവരുടെ മനീഷയ്ക്ക് ഒരു ക്ഷീണവുമില്ല: അവരുടെ പൊൻതൂലികയിലെ മഷി അൽപംപോലും ഉണങ്ങിയിട്ടുമില്ല. സത്യത്തിൽ എനിക്ക് അസൂയ തോന്നുന്നു.