തെറ്റായ നീക്കങ്ങളെ ചെറുക്കാൻ വിദ്യാര്ഥികളെ ഭരണഘടനയുടെ ആമുഖം പഠിപ്പിക്കണം: അടൂര് ഗോപാലകൃഷ്ണന്
Mail This Article
കൊച്ചി: ജാഗ്രതയോട് കൂടി സംരക്ഷിക്കേണ്ട കാര്യമാണ് നമ്മുടെ സ്വാതന്ത്ര്യവും ജനാധിപത്യ വ്യവസ്ഥയുമെന്നും അതിനെതിരായ എല്ലാ നീക്കങ്ങളെയും നമ്മള് ചെറുക്കണമെന്നും സംവിധായകന് അടൂര് ഗോപാലകൃഷ്ണന്. കലയും ചെറുത്തുനില്പും എന്ന വിഷയത്തില് കൃതി അന്താരാഷ്ട്ര പുസ്തകോത്സവത്തില് സംസാരിക്കുകയായിരുന്നു അദ്ദേഹം.
കേന്ദ്ര നയങ്ങള്ക്കെതിരെ രാജ്യത്ത് വ്യാപക പ്രതിരോധമുണ്ടായിട്ടുണ്ട്. കേരളത്തില് വലിയ രീതിയില് ചെറുത്തുനില്പ്പുണ്ടായത് അഭിമാനകരമായ കാര്യമാണ്. തെറ്റായ നീക്കങ്ങളെ ചെറുക്കുന്നതിന്റെ ഭാഗമായി നമ്മുടെ വിദ്യാര്ഥികളെ ഭരണഘടനയുടെ ആമുഖം പഠിപ്പിക്കണമെന്നും അടൂര് പറഞ്ഞു.
രാജ്യത്ത് ഒരുപാട് ഭീതി പടര്ന്നിട്ടുണ്ട്. പ്രതിഷേധമില്ലാതാവുന്നത് മോശമായ അവസ്ഥയാണ്. അഭിപ്രായം പറയേണ്ടവര് പോലും പറയാതെ മിണ്ടാതിരിക്കുന്നു. കേരളം കഴിഞ്ഞ ലോക്സഭാ തിരഞ്ഞെടുപ്പില് അറിഞ്ഞ് വോട്ട് ചെയ്തു. എന്നാല് ആ അവബോധം രാജ്യത്തിന്റെ മറ്റു ഭാഗങ്ങളിലില്ല. വലിയ ആള്ക്കൂട്ടത്തെ മാനിപ്പുലേറ്റ് ചെയ്യുകയാണെന്നും അടൂര് പറഞ്ഞു.
English Summary: Adoor Gopalakrishnan Talks At Krithi Book Fair