പ്രകൃതി നീ പിണങ്ങിയോ – സ്മിത സ്റ്റാൻലി എഴുതിയ കവിത
Mail This Article
നഷ്ടമായത് എനിക്കല്ലേ കാലമേ
ഇഷ്ടമായിരുന്ന എൻ പ്രിയ ജീവിതം
ഉറ്റവർ പോയെന്റെ വാസഗേഹം പോയി
ഒറ്റയായ് ഈ മണ്ണിൽ ശേഷകാലം ഞാനും
നിന്നിടം പോലുമേ സ്വന്തമല്ലാതായി
എന്തിനീ ദുർവിധി എന്നെ ചതിച്ചുപോയ്
ദുഃഖം നിറഞ്ഞെന്റെ നെഞ്ചകം തേങ്ങുന്നു
ദുഃസ്വപ്നമായെന്റെ ജീവിതം തിങ്ങുന്നു
ഇത്ര ദുരന്തങ്ങൾ ആർക്കുള്ള ശിക്ഷ!
തെറ്റ് ചെയ്തോർക്കെല്ലാം കിട്ടിയോ ശിക്ഷ?
മണ്ണിന് നൊന്താൽ മഴ കരഞ്ഞീടുമോ
മഴയുടെ വേദന കാറ്ററിഞ്ഞീടുമോ
കാറ്റിന്റെ തേങ്ങലിൽ ഭൂമിയും നോവുമോ
ശിക്ഷയായ് ഭൂമി നീ പൊട്ടിത്തെറിക്കുമോ
ചോദ്യങ്ങൾ ഏറെയീ വൈകിയ വേളയിൽ
ഭൂമി എടുത്തല്ലോ എന്റെ പൈതങ്ങളെ
ഞാൻ എന്റെ മണ്ണിനെ സ്നേഹിച്ചിരുന്നു
എന്നിട്ടും സർവതും നഷ്ടമായ് മണ്ണിതിൽ
മരം മുറിച്ചോരെല്ലാം സൗധങ്ങൾ തീർത്തു
പ്രകൃതി തൻ നൊമ്പരം പെരുമഴ തീർത്തു
ഭൂമി കുഴിച്ചവർ സമ്പത്ത് കൊയ്തു
ഭൂമിയെ അറിഞ്ഞവൻ പെരുവഴി പൂകി
എങ്കിലും കാലമേ എല്ലാം മറക്കാനായ്
ഏകനാം എന്നെ നീ മണ്ണായി മാറ്റുക ..