സോണി കാരയ്ക്കല് എഴുതിയ പത്ത് കുറുങ്കവിതകള്
Mail This Article
പാഠം ഒന്ന്
വാതിലടയ്ക്കാനാണ്
അവളെന്നെ
ആദ്യം പഠിപ്പിച്ചത്
പിന്നെ വാ അടയ്ക്കാനും.
പ്രവാസം
നാട്ടിലെത്തി
പെട്ടിതുറക്കും മുന്പേ
ഞെട്ടിപ്പിക്കുന്ന ചോദ്യം
തിരിച്ചെന്നാ പോക്ക് ?
അതോടെ പെട്ടിയുമടച്ച്
മരുഭൂമിയിലേക്ക്
ഓടാന് തോന്നും.
വീട്
വീടുവെയ്ക്കാന്
വീടുവിട്ടവര്
വീടുവെച്ചപ്പോള്
വീട്ടില് നിന്നും പുറത്ത്
പരിഷ്കാരം
പണ്ട് അടിക്കൊരു-
മുന്നറിയിപ്പുണ്ടായിരുന്നു
ഇന്ന് കൊട്ടെഷനായതിനാല്
മരിച്ചറിയിപ്പ് മാത്രേയുള്ളൂ
അട്ട
അട്ടപോലെ
ഒട്ടിക്കിടന്നവള്
ഇന്ന് മെട്രോപോലെ
ഓടിനടക്കുന്നു
കാലന്
കാരണംകാണിക്കല്-
നോട്ടീസ് കാണിക്കാതെ
കടന്നുവരുന്ന
കാര്യസ്ഥനാണ് കാലന്.
വയര്ലെസ്സ്
പൊക്കിള്ക്കൊടി
മുറിച്ചുകളഞ്ഞപ്പോള്
ഞാനും നീയും
വയര്ലെസ്സായി .
മുഷിപ്പ്
രാഷ്ട്രീയക്കാര്ക്ക്
യോജിച്ച നിറം
കറുപ്പോ വെളുപ്പോ ?
എന്തായാലും മുഷിയുന്നത്
നിറമല്ലല്ലോ ജനമല്ലേ ?
വാര്ത്തകള്
വര്ത്തമാനകാലത്ത്
വര്ത്തമാനം കുറഞ്ഞു.
വാര്ത്തകള് മാത്രം
കുറഞ്ഞില്ല..
സംസാരം
പുട്ടുപോലെയാണ്
അവളുടെ സംസാരം
ഇടയ്ക്ക് തേങ്ങയും
ജീരകവും അരിപ്പൊടിയും
പുകയും കാണും