ശരിയാണ് – ശിബ്‌ലി അമ്പലവൻ എഴുതിയ കവിത

ശരിയാണ് ചിത്രശലഭങ്ങളുടെ 

ചിറക് പൊഴിഞ്ഞാണ്

പൂക്കൾക്കിതളുകൾ മുളയ്ക്കുന്നത്

ഇബ്രാഹീമുമാർ ഉപേക്ഷിച്ചുപോയ 

കാൽപ്പാടുകളിൽ നിന്നാണ് 

സംസം ജലങ്ങൾ ഉറവയെടുക്കുന്നത്

ഇത് വരെ നിങ്ങൾക്ക് തെറ്റിയില്ല....
 

പക്ഷേ, നിങ്ങൾ അവസാനമെറിഞ്ഞ

കല്ലിലും എന്റെ പേരില്ലായിരുന്നെന്ന് 

ഞാൻ പറഞ്ഞപ്പോൾ

സാത്താൻ പോലും നാണിച്ചുപോയി

ശ്മശാനങ്ങളിൽ ചെന്ന് ശവങ്ങളോട് നിങ്ങൾ 

ഉയിർത്തെഴുന്നേൽക്കാൻ പറഞ്ഞപ്പോൾ

മൈലാഞ്ചിച്ചെടികൾ പോലും ചിരിച്ചുപോയി
 

അത് കൊണ്ട് ഇപ്പോളെങ്കിലും മനസ്സിലാക്കൂ...

എല്ലാ ചോദ്യങ്ങൾക്കും ഉത്തരമുണ്ടാകണമെന്നില്ല

എല്ലാ മാവും പൂക്കണമെന്നില്ല

ഖദറുടുത്താൽ കരിങ്കൊടി കാണാതിരിക്കണമെന്നില്ല

ഇത്രയും മനസ്സിലാക്കിയാൽ

നിങ്ങൾക്ക് ജീവിക്കാനുള്ള പൗരത്വം കിട്ടും.
 

Content Summary: Malayalam Poem ' Sariyanu ' written by Shibli Ambalavan