കടലാഴങ്ങളിൽ – കാവല്ലൂർ മുരളീധരന് എഴുതിയ കവിത
![malayalam-poem-neeyenne-ormipichu-kondeyirikkunnu Representative image. Photo Credit: Diy13/istockphoto.com](https://img-mm.manoramaonline.com/content/dam/mm/mo/literature/your-creatives/images/2022/9/27/malayalam-poem-neeyenne-ormipichu-kondeyirikkunnu.jpg?w=1120&h=583)
Mail This Article
ജോണിന് കടലിനോടു പ്രണയമാണ്
ആർത്തലച്ചു വരുന്ന തിരകളാൽ
കടൽ ആശ്ലേഷിക്കും
പുണരുന്ന തിരകളിൽ
നിറയെ പ്രണയമാണ്
വീണ്ടും വീണ്ടും പുണർന്നു
കൊതി തീരും വരെ
ജോൺ കടലിനെ പ്രണയിക്കും
കടലിന്നടിയിൽ
മൽസ്യകന്യകയുണ്ടെന്നും
അവളുടെ വലിയ കൊട്ടാരമുണ്ടെന്നും
എല്ലാ കാമുകന്മാരെപ്പോലെ
ജോണും വിശ്വസിക്കുന്നു
അവളുടെ കൈകളാണ്
തിരകളായി വന്നു പുണരുന്നതെന്ന്
രാത്രിയിൽ ചിലപ്പോൾ
ജോൺ കടലിന്നോട്
ചേർന്ന് കിടക്കും
ഇടയ്ക്കുള്ള തിരകളുടെ സ്പർശം
അവനൊരു താരാട്ടു പാട്ടാണ്
കടലിന്നടിയിലെ അവന്റെ
കാമുകിയുടെ താരാട്ട്
ഒരു ദിവസം ജോൺ
കടലിലേക്കിറങ്ങിപ്പോയി
തന്റെ മൽസ്യകന്യകയെ തേടി
അവളുടെ കൊട്ടാരം തേടി
കടലാഴങ്ങളിൽ
ജോണിന്റെ കണ്ണുകൾ വിടർന്നു
ആത്മാവിൽ പൂക്കൾ വിരിഞ്ഞു
കടലാഴങ്ങളിൽ
പ്രണയം തളംകെട്ടി കിടന്നു
ജോൺ അതിൽ നീന്തി നടന്നു
Content Summary: Malayalam Poem ' Kadalazhangalil ' Written by Kavalloor Muraleedharan