പല മട്ടു നടന്നു നമ്മള-

ന്നൊരുലോകവിചാര വീഥിയില്‍

പല ദേശമലഞ്ഞു നമ്മളാ

ഘടികാരങ്ങളഴിഞ്ഞ ദീപ്തിയില്‍.
 

ചിലതോര്‍മ്മകളായ് ഹിമാംശുവായ്

കിരണാവലിയെന്നു കാഴ്ച്ചയായ്

ചിലതഗ്നികെടാതെയുള്ളിലും

പരമാഗ്നിയിലാളി ലോകമായ്
 

ഇടനാഴിയിലിരുണ്ടതാം നിഴല്‍

തുറവിലുജ്വലരായ് പ്രകാശമായ്

നരജീവിതക്ലിഷ്ടമാം കഥാ-

ഗതിയില്‍ കാവ്യവിചാരദുര്‍ഗമായ്
 

പകലഗ്നിയമര്‍ന്ന സന്ധ്യയില്‍

പതിവായ് ഗാര്‍ഹികമാം നിലാവതായ്

പ്രതിബോധമകന്നു വിസ്മിതം

പ്രിയമെന്നുള്ളകമാര്‍ന്നു ശാന്തമായ്.
 

ഗതികെട്ടെന്നലയുന്ന മാനസം

ച്യുതിവിട്ടാര്‍ദ്രമലിഞ്ഞ രാവതില്‍

വ്യഥകള്‍ കാവ്യകഥാന്തരങ്ങളായ്

പതിവറ്റാത്മസുഗന്ധജീവനായ്.
 

മഹിവിട്ടകലങ്ങള്‍ താണ്ടുവാന്‍

അഹമത്രയകന്ന തോഴ,നി-

ന്നപരാത്മകമാം ഗതിക്രമം

പരമാത്മാവിലലിഞ്ഞു ശാശ്വതം.

(അന്തരിച്ച കഥാകൃത്തും നോവലിസ്റ്റുമായ പ്രിയ സുഹൃത്ത് എം. സുധാകരന്)
 

Content Summary: Malayalam Poem ' Sudhakaram ' Written by Rajan C. H.